Artıq dörd ildir ki, Rabitə və İnformasiya Texnologiyaları Nazirliyi, Heydər Əliyev Fondu, Təhsil Nazirliyi və AMEA İnformasiya Texnologiyaları İnstitutunun birgə təşkilatçılığı ilə ali məktəb tələbələri arasında informatika fənni üzrə ümumrespublika olimpiadası keçirilir. Bu olimpiada digər fənn olimpiadalarından fərqlənir, yarışma xarakterlidir və burada hər biri üç nəfərdən ibarət olmaqla ali məktəb tələbələrindən ibarət komandalar iştirak edirlər.

Hər il olduğu kimi, bu il də olimpiada iki mərhələdə keçirilir. Bu olimpiadanın keçirilməsində əsas məqsəd gənclərin İKT biliklərinin təkmilləşdirilməsi, informatika və proqramlaşdırma sahəsində istedadlı tələbələrin aşkara çıxarılmasından, respublikamızda bu istiqamətdə həyata keçirilən işlərə dəstək olmaqdan ibarətdir.

Xatırladaq ki, olimpiadanın birinci seçim mərhələsi 10 aprel 2010-cu il tarixdə Qafqaz Universitetində olmuşdur. 17 may Ümumdünya Telekommunikasiya və İnformasiya Cəmiyyəti gününə həsr olunan bu olimpiadanın birinci mərhələsində ölkəmizin 10 ali məktəbini təmsil edən 42 komanda iştirak etmişdir. Onlardan 6 ali məktəbi təmsil edən 20 komanda ikinci mərhələyə vəsiqə qazanmışdır.

Bu il mayın 8-də isə AMEA İnformasiya Texnologiyaları İnstitutunda "Ali məktəb tələbələri arasında informatika üzrə ümumrespublika olimpiadası"nın ikinci, final mərhələsi keçirildi.

Qeyd edək ki, olimpiadanın final mərhələsinə vəsiqə almış Bakı Dövlət Universiteti, Azərbaycan Dövlət Neft Akademiyası, Qafqaz Universiteti, Azərbaycan Texniki Universiteti, Naxçıvan Dövlət Universiteti və Moskva Dövlət Universitetinin Bakı filialının tələbələrindən ibarət komandalar iştirak edirdilər.

Söhbət zamanı olimpiadanın təşkilat komitəsinin sədri Ramin Mahmudzadə MDB ölkələri arasında informatika üzrə olimpiadanın cari ilin oktyabrında keçiriləcəyini bildirdi. O, qalib komandanın ölkəmizi informatika üzrə beynəlxalq yarışların yarımfinalında təmsil edəcəyini vurğuladı.

Olimpiadanın şərtlərinə görə, hər bir komanda beş saat ərzində 7 məsələ həll etməli idi. Bu məsələləri tam həll edən komandanın 250 bal toplaya bilməsi nəzərdə tutulmuşdu.

Nəhayət, həmin gün gərgin keçən olimpiadanın ikinci turunun qaliblərinin adlarını Təhsil Nazirliyinin şöbə müdiri İsmayıl Sadıqov elan etdi. Məlum oldu ki, I yeri Bakı Dövlət Universitetinin, II yeri Azərbaycan Dövlət Neft Akademiyasının, III yeri isə Moskva Dövlət Universitetinin Bakı filialının tələbələrindən ibarət komandalar tutublar.

Bu olimpiadada müsabiqədənkənar iştirak edən VIII, IX və X sinif şagirdlərinin təmsil etdikləri "Hli school" komandası da yüksək bal toplayaraq özünü sınadı.

Qaliblər 17 may Ümumdünya Telekommunikasiya və İnformasiya Cəmiyyəti günündə qiymətli hədiyyələrlə mükafatlandırılacaqlar.

Ədalət DAŞDƏMİRLİ