Mayın 8-də Heydər Əliyev adına Müasir Təhsil Kompleksində məktəblilərin III İntellekt olimpiadası keçirilmişdir.

Olimpiada iştirakçıları əvvəlcə ümummilli lider Heydər Əliyevin Müasir Təhsil Kompleksinin həyətindəki abidəsi önünə gül dəstəsi düzmüşlər.

Olimpiadanın açılış mərasimində çıxış edən kompleksin direktoru, dosent Sevinc Rzayeva bildirmişdir ki, ulu öndər Heydər Əliyevin xatirəsinə həsr olunmuş intellekt yarışı artıq üçüncü dəfədir təşkil olunur. Heydər Əliyev Fondunun dəstəyi ilə həyata keçirilən olimpiadada paytaxtın müxtəlif rayonlarından 20 məktəb və liseyin komandaları iştirak edirlər. Bu yarış şagirdlərə intellektual bacarıqlarını nümayiş etdirməyə imkan yaradır və birbaşa informasiya və kommunikasiya texnologiyalarının (İKT) tətbiqi ilə onlayn rejimdə keçirilir. Olimpiada fizika, riyaziyyat, kimya, biologiya, tarix, coğrafiya, ingilis dili fənlərini əhatə edir.

Olimpiadanın məqsədi yüksək intellektual hazırlığı olan şagirdləri üzə çıxarmaq, onları həvəsləndirmək, həmçinin İKT-dən istifadə vərdişləri aşılamaq və məktəblilərin gələcəkdə informasiya cəmiyyətinin fəal üzvü kimi yetişməsinə imkan yaratmaqdır.

S.Rzayeva təhsilin inkişafında Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın əvəzsiz xidmətlərini xüsusi vurğulamışdır. Bildirmişdir ki, Mehriban xanım Əliyevanın təşəbbüsü ilə ölkəmizdə son illərdə müasir standartlara cavab verən təhsil müəssisələri tikilmişdir.

Olimpiadaya start verildikdən bir neçə saat sonra qaliblər müəyyən olunmuşdur.

Heydər Əliyev adına Müasir Təhsil Kompleksinin şagirdlərinin təqdim etdikləri konsert proqramından sonra qaliblərin mükafatlandırılması mərasimi keçirilmişdir.

"Sürət" nominasiyası üzrə 147 nömrəli məktəb birinci, 8 nömrəli məktəb ikinci, 42 nömrəli məktəb isə üçüncü olmuşdur. "Diqqət" nominasiyasında qalib yerləri müvafiq surətdə 164 nömrəli, 299 nömrəli və 292 nömrəli məktəblər tutmuşlar. "Məntiq" nominasiyası üzrə 145 nömrəli məktəb birinci, 93 nömrəli məktəb ikinci, 18 nömrəli məktəb isə üçüncü yerə çıxmışdır. "Mütləq" nominasiyasının qalibləri 72 nömrəli, 100 nömrəli və 27 nömrəli məktəb hesab edilmişdir.

Nominasiyalar üzrə qaliblər mükafatlandırılmış, hər bir iştirakçıya sertifikatlar verilmişdir.  

AzərTAc