Bakıdakı 147 nömrəli texniki-humanitar liseydə aprelin 29-da "Ekologiya ili" çərçivəsində şagird elmi-praktik konfransı keçirildi. Liseyin binasının birinci mərtəbəsindəki foyedə Azərbaycanın iqtisadi rayonlarına və bölgələrinə aid şagirdlərin əl işlərindən ibarət maraqlı sərgi açılmışdı. Hər iqtisadi rayona və bölgəyə aid guşədə həmin yer üçün xarakterik olan məhsullar, habelə bölgəni səciyyələndirən fəaliyyət sahəsinə dair eksponatlar nümayiş olunurdu.

Foyenin bir tərəfində isə ev quşları və heyvanlarından ibarət canlı guşə var idi. Konfransa dəvət almış qonaqlar - tanınmış alimlər, liseyin fəxri direktoru, AMEA-nın müxbir üzvü, millət vəkili, professor Nizami Cəfərov, akademik Urxan Ələkbərov, BDU-nun kafedra müdiri, professor Qara Namazov, professorlar Cəlil Nağıyev, Ülfət Bədəlbəyli, Məlikbaxış Babayev, Xətai RİH-in şöbə müdiri Pənah İmanov, Bakı Şəhəri üzrə Təhsil İdarəsi müdirinin müavini Məhəmməd Bayramov, "Azərbaycan məktəbi" jurnalının baş redaktoru  Nəcəf Nəcəfov və başqaları sərgi ilə maraqla tanış oldular.

Konfransın plenar iclasını liseyin direktoru Həlimə Mehdiyeva açaraq qonaqları salamladı, dəvətlərini qəbul edib gəldikləri üçün onlara təşəkkür etdi.

H.Mehdiyeva son illər liseylərində təhsilin keyfiyyətinin yüksəldilməsi istiqamətində görülmüş işlər, liseyləri ilə alimlər arasında yaranan sıx əməkdaşlıq əlaqələri, bu əlaqələrin nəticəsi olaraq müxtəlif elm sahələrini təmsil edən mütəxəssis və alimlərin liseydəki tədris prosesində, keçirilən tədbirlərdə iştirakı, şagirdlərdə elmi-tədqiqatçılıq bacarıq və vərdişlərinin inkişafı, məzunlarının uğurları haqqında məlumat verdi. Liseyin istedadlı şagirdləri konfrans iştirakçılarını mahnı və şeirlərlə salamladılar.

Plenar iclasda söz alan professor Nizami Cəfərov, Xətai RİH-in şöbə müdiri Pənah İmanov, Bakı Şəhəri üzrə Təhsil İdarəsi müdirinin müavini Məhəmməd Bayramov ekoloji mövzuda sərginin onlarda xoş təəssürat yaratdığını, təhsil ocağında şagird yaradıcılığına, axtarışlarına böyük fikir verildiyini, son illər liseyin təhsil uğurlarının xeyli artdığını bildirdilər. Konfransın əhəmiyyətini xüsusi qeyd edən qonaqlar belə tədbirlərin şagirdlərin intellektini inkişaf etdirdiyini, müəllimlərin bu işdə aparıcı rol oynadığını diqqətə çatdırdılar.

Sonra konfrans öz işini bölmələrdə davam etdirdi. Hər birinə liseyin müəllimlərinin rəhbərlik etdiyi, alim və mütəxəssislərin ekspert qismində cəlb olunduqları "Ədəbiyyat", "Riyaziyyat və informatika", "Tarix və coğrafiya", "Fizika", "Kimya, biologiya", "İngilis dili" bölmələrində 18 şagirdin məruzəsi dinlənilərək müzakirə olundu. Müzakirələrdə çıxış edən alimlər şagirdlərin təqdim etdikləri məruzələri yüksək dəyərləndirib, onların əhatəli işləndiyini, məktəblilərin işlədikləri mövzular haqqında geniş məlumata malik olduqlarını qeyd etdilər. 

Yusif ƏLİYEV