Türkiyə Cümhuriyyətinin Elazığdakı Fırat Universitetinin təmsilçiləri Naxçıvan Dövlət Universitetində oldular. NDU-nun rektoru, akademik İsa Həbibbəyli qonaqları salamlayaraq, "bir millət, iki dövlət" məramının universitetlərarası əlaqələrdə də uğurla təzahür etdiyini vurğuladı. Naxçıvan Dövlət Universitetinin Türkiyənin Ankara, Qars, Kocaeli, Erciyəz universitetləri ilə sıx əməkdaşlıq etdiyini xatırladan rektor xüsusilə də Elazığ Universiteti ilə tərəfdaşlığın bütün türk dünyası universitetlərinə örnək ola biləcəyini söylədi. Görkəmli ədəbiyyatşünas Bakıda təqdimat mərasiminin keçirilməsi nəzərdə tutulan "Elazığ çələngi" adlı şeirlər toplusunun əhəmiyyətindən də bəhs etdi.

Elazığ Universitetinin İnsani və sosial bilimlər fakültəsinin türk dili və ədəbiyyatı müəllimi, dosent, doktor Tarih Özcan səmimi qarşılanma üçün minnətdarlığını bildirərək elmi-mədəni əlaqələrin inkişafında, müştərək tədbirlərin həyata keçirilməsində universitet rektorlarının - professor, doktor Feyzi Bingöl və akademik İsa Həbibbəylinin fəaliyyətlərinin böyük rol oynadığını bildirdi.

Görüşdə türk dünyasında elmin, təhsilin tərəqqisi üçün birgə həyata keçiriləcək planlardan söz açıldı.