Bakıdakı 53 nömrəli məktəbdə  "Ana dilim, yaşa, dilim!" adlı tədbir keçirildi. Tədbirdə direktor Firəngiz Həsənova qonaqları salamladıqdan sonra bildirdi ki, bizim ana dilimiz Azərbaycan dilini ulu babalarımız və ulu öndərimiz Heydər Əliyev də çox sevib, ona həmişə böyük qiymət verib. Dünyanın ən qədim dillərindən sayılan dilimizi biz də bilməli, sevməli və onun saflığını qorumalıyıq.

Tədbirdə çıxış edən Bakı Dövlət Universitetinin müəllimi, professor Yusif Seyidov türk dünyası dillərinin fövqündə dayanmağa layiq olan Azərbaycan dilinin zənginliyindən söz açdı.

Məktəbin şagirdlərinin böyük həvəslə hazırladıqları C.Məmmədquluzadənin "Qurbanəli bəy" hekayəsi, "Anamın kitabı" dramı, C.Cabbarlının "Oqtay Eloğlu", İlyas Əfəndiyevin "Xurşudbanu Natəvan" əsərlərindən göstərdikləri səhnəciklər onların doğma ana dilinə böyük məhəbbətinin nümunəsi idi. Şagirdlərin S.Vurğunun, R.Rzanın, M.Müşfiqin ana dili haqqında yazılmış şeirləri əsasında hazırladıqları "Ana dilim, yaşa, dilim!" adlı  ədəbi-bədii kompozisiya tədbir iştirakçılarının qəlbinə hakim kəsildi. 

Ədalət DAŞDƏMİRLİ