Fevralın 24-də Qafqaz Universitetində bu ali təhsil ocağının Beynəlxalq Münaqişələri Araşdırma Mərkəzi ilə Şimali Kipr Türk Respublikasının Bakıdakı nümayəndəliyi birgə seminar keçirmişlər. Müvafiq institutların və araşdırma mərkəzlərinin nümayəndələrinin iştirak etdiyi seminarda "Kipr problemi və gələcək perspektivləri" mövzusunda məruzə dinlənilmiş və "dəyirmi masa" ətrafında müzakirə aparılmışdır.

Seminarı giriş sözü ilə Qafqaz Universitetinin rektoru, professor Ahmet Saniç açmış, sonra Kipr probleminin tarixindən və çözülməsi ilə bağlı göstərilən fəaliyyətlərdən, Şimali Kipr Türk Respublikasının inkişaf yolundan, bugünkü həyatından bəhs edən film nümayiş olunmuşdur. Şimali Kipr Türk Respublikasının Bakı təmsilçisi Zəki Qazikoğlu Kipr münaqişəsinin tarixi haqqında qısa arayış vermiş, problemin həlli perspektivlərindən danışmışdır.

Seminarda Qafqaz Universiteti Beynəlxalq Münaqişələri Araşdırma Mərkəzinin əməkdaşı Ceyhun Mahmudov "Şimali Kipr Türk Respublikasının azərbaycanlılarda formalaşmış imici" adlı məruzə təqdim etmişdir.

Seminarda iştirak edən tanınmış politoloq Vəfa Quluzadə mövzu ilə bağlı müəllim və tələbələri maraqlandıran sualları cavablandırmışdır. 

Yusif ƏLİYEV