Fevralın 23-də Azərbaycan  Müəllimlər İnstitutunda  Azərbaycan Respublikası  əsir  və itkin düşmüş, girov götürülmüş vətəndaşlarla əlaqədar Dövlət  Komissiyası  və  AMİ ilə birgə "Vətənpərvərlik tərbiyəsinin formalaşmasında və Azərbaycan həqiqətlərinin yayılmasında ictimaiyyətin rolu" mövzusunda respublika  konfransı keçirildi.

Tədbiri giriş sözü ilə AMİ-nin rektoru, professor Aqiyə Naxçıvanlı açaraq bildirdi ki, keçirilən konfransın məqsədi Ermənistan-Azərbaycan Dağlıq Qarabağ münaqişəsinin tarixinə nəzər salaraq  təcavüz zamanı törədilmiş soyqırımı, etnik təmizləmə, terror, insanlığa və bəşəriyyətə qarşı digər cinayətlər, o cümlədən, əsir və girovlarla münasibətdə beynəlxalq hüquq normalarının pozulması ilə  bağlı faktların ictimaiyyətin, xüsusən tələbə-gənclərin diqqətinə  çatdırmaqdır. Ən vacib vəzifələrdən biri tələbə- gənclərdə  vətənpərvərlik və vətəndaşlıq hisslərinin möhkəmlənməsinə, formalaşmaqda olan gələcək nəsillərin bu cinayətlərdən xəbərdar olaraq düzgün nəticələr çıxarmasına nail olmaqdır. Həm də  təcavüz zamanı Ermənistan ordusu və terrorçu qrupları tərəfindən törədilmiş cinayət əməllərinin ölkə və  beynəlxalq ictimaiyyətin diqqətinə  çatdırılması üçün  təbliğat işlərinə geniş yer vermişdir.

AMİ-nin ixtisasartırma və yenidənhazırlanma  fakültəsinin dekanı Telman  Haqverdiyev, Azərbaycan Respublikası əsir və  itkin düşmüş, girov götürülmüş vətəndaşlarla əlaqədar Dövlət Komissiyasının işçi qrupunun rəhbəri Firudin Sadıqov və başqaları çıxış edərək ermənilər tərəfindən Azərbaycan ərazisində törədilmiş terror-təxribat faktlarından ətraflı danışdılar.

Sonra erməni əsirliyindən azad olmuş Bəxtiyar Nağıyev  döyüş zamanı əsir düşməyindən   və  əsirlikdə olduğu müddətdə başına gələn  işgəncələrdən ürəkağrısı ilə  danışdı.

Tədbirin sonunda Azərbaycan torpaqlarında ermənilərin törətdikləri vəhşiliklərə aid film göstərildi. 

Şakir CƏFƏROV