Fevralın 19-da Azərbaycan Dillər Universitetinin (ADU) İnformasiya Resurs Kompleksində universitetin İctimaiyyətlə əlaqələr və mətbuat xidmətinin yaranmasının 1, "Poliqlot" qəzetinin 10 illiyinə həsr olunmuş yubiley mərasimi keçirildi.

Tədbirin əvvəlində mətbuat xidmətinin 1 illik fəaliyyətini əks etdirən slaydlar nümayiş etdirildi. ADU-nun İctimaiyyətlə əlaqələr və mətbuat xidmətinin rəhbəri Zeynab Kazımova tədbiri açaraq qurumun yaranmasından və fəaliyyətindən danışdı. Ali təhsil müəssisələri içərisində yalnız ADU-nun mətbuat xidmətinin KİV nümayəndələri üçün brifinq təşkil etdiyi 2009-cu il ərzində ADU haqqında KİV-də 1000-dən çox materialın getdiyi qeyd edildi. Bu fəaliyyətlərinin təhsil naziri Misir Mərdanov tərəfindən də yüksək qiymətləndirilərək təşəkkür məktubu aldıqlarını bildirən Z.Kazimova bu uğurlara görə öncə universitetin rektoru Səməd Seyidova təşəkkür etdi, "Poliqlot" qəzetinin ilk universitet nəşri olaraq Mətbuat Şurasının üzvü olduğu bildirildi.

ADU-nun rektoru, millət vəkili, professor Səməd Seyidov çıxış edərək Dillər Universitetinin tarixindən, onun keçdiyi şərəfli yoldan danışdı. İctimaiyyətlə əlaqələr və mətbuat xidmətinin və "Poliqlot" qəzetinin fəaliyyətindən razılığını bildirən Səməd Seyidov universitetin həyatında baş verən hadisələrin tez bir zamanda işıqlandırılmasını xidmətin əməyinin bəhrəsi olduğunu vurğuladı.

Sonra nominasiyalar üzrə mükafatlandırılma mərasimi baş tutdu. ADU-nun fəaliyyətini ən yaxşı və geniş işıqlandıran televiziya kimi Azərbaycan Televiziyası, İTV, LİDER TV, ən yaxşı və geniş işıqlandıran qəzetlər kimi "İki sahil", "Azərbaycan müəllimi", "525-ci qəzet", "Azərbaycan", "Xalq qəzeti", " Respublika", "Yeni Azərbaycan" qəzetləri, ən yaxşı və geniş işıqlandıran informasiya agentlikləri kimi AzərTAc, APA, SİA, Azadinform, Riyad Media informasiya agentlikləri, ADU ilə əməkdaşlıqlarına görə ANS, Space, ATV, Xəzər televiziya kanalları, "Ayna", "Zerkalo" qəzetlərinin, "1 news.az", "Trend" informasiya agentliklərinin əməkdaşlarına təşəkkür məktubları verildi. ADU ilə mütəmadi əməkdaşlıqlarına görə isə AzərTAc informasiya agentliyindən Araz Fərzəliyev, "Azərbaycan müəllimi" qəzetindən Şakir Cəfərov, "Respublika" qəzetindən Cavid Məmmədov, "Lent.az" saytından Pərvin Abbasov, "Nedelya" qəzetindən Milana Juçkova, "Zerkalo" qəzetindən Sevinc İsmayılova müxtəlif hədiyyələrlə mükafatlandırıldılar. APA informasiya agentliyinin əməkdaşı Viktoriya Dementyeva və "525-ci qəzet"in əməkdaşı Sevinc İsmayılovaya isə noutbuk hədiyyə edildi.

Tədbirdə millət vəkili Asim Mollazadə, Milli Məclisin Mətbuat xidmətinin rəhbəri Akif Təvəkküloğlu, Xarici İşlər Nazirliyinin Mətbuat xidmətinin rəhbəri Elxan Poluxov, Mədəniyyət və Turizm Nazirliyinin Mətbuat xidmətinin rəhbəri Zöhrə Əliyeva çıxış edərək ADU-nun İctimaiyyətlə əlaqələr və mətbuat xidmətinin 1 illik, "Poliqlot" qəzetinin 10 illik yubileyi münasibəti ilə təbriklərini çatdırdılar. 

M.NOVRUZOV