Dekabrın 22-də Bakıdakı 182 nömrəli orta məktəbdə Azərbaycanın vətənpərvər və qeyrətli oğulları, Milli Qəhrəman  Mübariz İbrahimov və "İgidliyə görə" medalı ilə təltif edilmiş (ölümündən sonra) baş leytenant Fərid Əhmədova  həsr olunmuş "Vətənin igidləri " adlı tədbir keçirildi.

Şagirdlərin ifasında Dövlət himninin oxunması, həmişə zirvələrdə  dalğalanan üçrəngli bayrağın gətirilməsi ilə başlanan gecədə təhsil ocağının direktoru Zinyət Tağıyeva vətənpərvərlik mövzusundan geniş danışaraq, şagirdlərə Mübariz və Fərid kimi vətənini sevməyi, qorumağı tövsiyə etdi. Bildirdi ki, Azərbaycan xalqı qəhrəman oğullarını heç vaxt unutmayacaq və onları həmişə qəlbində yaşadacaqdır. 

Məktəbin 10-cu sinif şagirdi İnsaf İsayeva Milli Qəhrəmanların həyat yolu və göstərdikləri şücaətləri haqqında tədbir iştirakçılarına məlumat verdi.

Şagirdlər Milli Qəhrəmanlara həsr olunan şeirlər söyləyib, mahnılar ifa etdilər.

Tədbirdə iştirak edən qonaqlar da Mübariz və Fəridin qəhrəmanlıq və igidliklərindən danışdılar. Onlar belə tədbirlərin təhsil ocaqlarında keçirilməsini müsbət qiymətləndirdilər.

Gecə Milli Qəhrəmanlara həsr olunmuş filmin nümayişi ilə başa çatdı. 

R.RAMAZANOĞLU