Dekabrın 17-də Bakı Dövlət Universitetinin və Bakı Təhsil Məlumat Mərkəzinin birgə təşkilatçılığı ilə BDU-da "Xaricdə təhsil" sərgisi keçirilib.

Tədbiri giriş sözü ilə açan BDU-nun elmi işlər üzrə prorektoru, professor İsmayıl Əliyev Azərbaycanın  elm və təhsil sisteminin sürətlə inkişaf etdiyini və dünya təhsil sisteminə  inteqrasiya olunduğunu bildirdi. O, "Xaricdə təhsil" sərgisinin məqsədinin bütün maraq göstərən şəxslərə və təşkilatlara gənclərin xaricdə təhsil almaq imkanları haqqında lazımi məlumat verməkdən ibarət olduğunu nəzərə çatdırdı.

Sonra söz təhsil nazirinin müavini Elmar Qasımova verildi.  Nazir müavini belə sərgilərin keçirilməsinin böyük əhəmiyyət daşıdığını və Təhsil Nazirliyi tərəfindən dəstəkləndiyini vurğuladı. E.Qasımov qeyd etdi ki, sərgilər azərbaycanlı tələbələrin xarici ölkələrin təhsil müəssisələrini seçmələrində böyük rol oynayır. E.Qasımov qeyd etdi ki,  xaricdə müxtəlif proqramlar üzrə təhsil almaq istəyən Azərbaycan vətəndaşları bu sərgi vasitəsilə istək və imkanlarına uyğun tədris müəssisələri ilə əlaqələrini sərbəst şəkildə qura biləcəklər. Təhsil Nazirliyi xaricdə təhsillə bağlı Dövlət proqramı çərçivəsində vətəndaşlara hər cür yardım göstərməyə hazırdır. O, tələbələrimizin xaricdə daha aktiv şəkildə təhsil alacaqlarına və gələcəkdə yüksək ixtisaslı kadrlar kimi vətənə qayıdaraq respublikamızın inkişafına töhfələr verəcəklərinə ümidvar olduğunu bildirdi.

Tədbirdə iştirak edən 20-dən artıq müəssisənin nümayəndələri öz təhsil proqramları və fəaliyyətləri haqqında məlumat verərək, sərgi iştirakçılarını materiallarla və bukletlərlə təmin etdilər.

Niyazi RƏHİMOV