Mayın 14-də Bakıdakı "Şəfa" stadionunda  Təhsil Nazirliyi, Azərbaycan Futbol Federasiyaları Assosiasiyası, Gənclər və İdman Nazirliyi, Dövlət  Neft Şirkəti və Azərbaycan  Tələbə Futbol Federasiyasının təşkilatçılığı ilə ümummilli lider Heydər Əliyevin anadan olmasının 87-ci  ildönümünə həsr olunmuş ali məktəb tələbələri  arasında futbol üzrə III respublika çempionatının açılış mərasimi keçirildi.

Tədbiri giriş sözü ilə  Azərbaycan Respublikası Dövlət  Neft Şirkətinin və AFFA-nın prezidenti, millət vəkili Rövnəq Abdullayev açaraq  tədbir iştirakçılarını salamladı və yarışda iştirak edən komandalar haqqında məlumat verdi.

Tədbirdə iştirak edən təhsil naziri  Misir Mərdanov ümummilli lider Heydər Əliyevin xatirəsinə həsr olunmuş ali məktəb tələbələri arasında futbol  üzrə  respublika çempionatının üçüncü il keçirildiyini nəzərə çatdırdı. Sonra   bu çempionatın təşkilində  əməyi olanlara təşəkkürünü bildirən nazir ali məktəb tələbələrinin keçirilən yarışlarda fəal iştirakını təqdirəlayiq hal kimi dəyərləndirərək onlara  uğurlar arzuladı.

Gənclər və idman naziri Azad Rəhimov, Milli Olimpiya Komitəsinin vitse-prezidenti Çingiz Hüseynzadə və başqaları respublikada  belə tədbirlərin keçirilməsinin əhəmiyyətindən  bəhs etdilər və ənənəvi çempionatın Azərbaycanda idmanın kütləviliyinin təmin olunmasına layiqli töhfələr verəcəyinə inandıqlarını bildirdilər.

"Şəfa" stadionunda keçirilən çempionatın təqvimi elan olundu. Həmin gün ilk yarışda Bakı Dövlət Universiteti  ilə Azərbaycan Dövlət İqtisad Universitetinin komandaları görüşdülər.

Şakir CƏFƏROV