Azərbaycan Milli Konservatoriyası tərkibindəki İncəsənət Gimnaziyasının VII sinif şagirdi Minirə Nəcəfzadə İspaniyanın Palma de Mallorca şəhərində keçirilən fortepiano ifaçılarının XVII beynəlxalq musiqi müsabiqəsində Azərbaycanı uğurla təmsil edərək I yerə layiq görülüb.

Qızıl medalla təltif olunmuş gənc musiqiçi Azərbaycanı beynəlxalq müsabiqələrdə artıq üçüncü dəfədir təmsil edir. O, 2008-ci ildə Fransada pianoçuların N.Rubinşteyn adına IX və İtaliyada P.Arcento adına pianoçuların beynəlxalq müsabiqələrində gümüş medalla təltif olunub.

Bu uğurların qazanılmasında onun müəllimi - istedadlı musiqiçi Zemfira Hüseynovanın xüsusi rolu var. Müəllimi Minirə Nəcəfzadənin gələcəkdə də Azərbaycanı dünyada uğurla təmsil edəcəyinə və ifaçılıq sənətində daha yeni zirvələrə yüksələcəyinə inanır.