Bakı Dövlət Universitetində (BDU) Türkiyə Cümhuriyyətinin qurucusu Mustafa Kamal Atatürkü Anma, Gənclik və İdman Bayramı qeyd edilmişdir. Bu bayram böyük şəxsiyyət Atatürkün 1919-cu il mayın 19-da 18 silahdaşı ilə Samsuna gəlməsinə, burada yadelli işğalçılara qarşı müqavimət hərəkatına başçılıq etməsinə həsr olunmuşdur.

Tədbirdə ulu öndər Heydər Əliyevin və müdrik şəxsiyyət Mustafa Kamal Atatürkün əziz xatirələri yad edilmiş, Azərbaycanın və Türkiyənin dövlət himnləri səsləndirilmişdir.

BDU-nun rektoru, Milli Məclisin deputatı, akademik Abel Məhərrəmov çıxış edərək ümummilli lider Heydər Əliyevin və qüdrətli şəxsiyyət Mustafa Kamal Atatürkün əbədiyaşar ideyalarının əhəmiyyətindən danışmışdır.

Azərbaycan ilə Türkiyənin tarixi birliyini vurğulayan rektor, türk dünyasının nurlu sabahına inandığını söyləmiş, gəncləri vətənpərvərliyə çağırmışdır.

Türkiyənin ölkəmizdəki səfiri Hulusi Kılıç, səfirliyin təhsil üzrə müşaviri Halis Koyuncuoğlu Türkiyə Cümhuriyyətinin yaranmasında və inkişafında böyük öndər Mustafa Kamal Atatürkün tarixi xidmətlərindən, siyasi irsinin əhəmiyyətindən bəhs etmiş, onun gənclərə tövsiyələrini xatırlatmışlar.

Sonra bayrama həsr olunmuş maraqlı konsert proqramı nümayiş etdirilmişdir.