Aprelin 8-də Azərbaycan Dövlət Pedaqoji Universitetinin böyük akt zalında Təhsil Nazirliyi Daxili İşlər Nazirliyi ilə birgə "İnsan alveri" mövzusunda tədbir keçirib.

Yığıncağı giriş sözu ilə açan ADPU-nun tərbiyə işləri üzrə prorektoru, professor Rafiq Baxşəliyev seminar xarakterli bu tədbirin mahiyyətindən, insanların maarifləndirilməsindəki rolundan danışıb.

İnsan alverinin törətdiyi faciəni toplantı iştirakçılarına əyani şəkildə çatdırmaq üçün monitor vasitəsilə bu mövzuya həsr edilmiş qısametrajlı film göstərilib.

Tədbirdə DİN-in İnsan Alverinə Qarşı Mübarizə İdarəsinin rəis müavini, polis polkovniki İmran Nəcəfov, Təhsil Nazirliyinin Tərbiyə və məktəbdənkənar müəssisələrlə iş şöbəsinin baş məsləhətçisi Elnur Əlizadə, "Təmiz dünya" qeyri-hökumət təşkilatının sədri Mehriban Zeynalova çıxış ediblər. Natiqlər dünyada hər gün 3 qadından birinin zorakılığa məruz qaldığını, insan alverinə qarşı mübarizəni genişləndirmək məqsədilə DİN-in mütəmadi tədbirlər planı hazırlayaraq həyata keçirdiyini, Azərbaycanın bütün təhsil ocaqlarında, xüsusilə ali məktəblərdə insan alverinə və terrorizmə qarşı mübarizə metodlarının maarifləndirilməsi işinin aparıldığını diqqətə çatdırıblar.

Nizami MİRZƏ