Bu yaxınlarda Pakistanın paytaxtı İslamabad şəhərində "Sufizm və sülh" mövzusunda beynəlxalq konfrans keçirilmişdir. Dünyada sülh, terror əleyhinə mübarizə, insan haqları məsələlərinə  həsr olunmuş, Pakistan Ədəbiyyat Akademiyasının təşkilatçılığı ilə keçirilən həmin konfransda dünyanın 35 ölkəsindən nümayəndələr iştirak etmişlər.

Bu tədbirdə Azərbaycanı Naxçıvan Dövlət Universitetinin "Qeyrət" nəşriyyatının direktoru, tarix elmləri namizədi, şair Vaqif Məmmədov və universitetin xarici tələbələrlə iş üzrə dekanı, filologiya elmləri namizədi, şair Xanəli Kərimli təmsil etmişlər. Konfransın ikinci günü Pakistan Prezidenti Asif Əli Zərdari Prezident sarayında "Sufizm və sülh" konfransının iştirakçılarından bir qrupunu qəbul etmişdir. Həmin qrupa naxçıvanlı nümayəndələr də daxil edilmişlər.

Beynəlxalq konfransın açılış günündə iştirak edən Azərbaycanın Pakistandakı fövqəladə və səlahiyyətli səfiri Eynulla Mədətli sonra səfirlik binasında naxçıvanlı  nümayəndələr ilə görüşmüşdür. Səfirliyin gördüyü işlər, Pakistan-Azərbaycan elmi-mədəni əlaqələri barədə ətraflı məlumat verən  səfir özünün tərtibçiliyi və redaktorluğu, akademik İsa Həbibbəylinin ön sözü ilə bir neçə gün əvvəl Pakistanda ingilis dilində çap olunmuş "Azərbaycan poeziyası: dəryadan damla" almanaxını qonaqlara təqdim etmişdir.  

Mehriban SULTAN