Yeni fəaliyyətə başlayan hər hansı bir təhsil müəssisəsinin öz uğurları ilə tanınması, yaxşı ad çıxarması üçün adətən, illər lazım gəlir. Paytaxtımızın Qaraçuxur yaşayış sahəsində ötən il əsaslı təmirdən sonra istifadəyə verilmiş 338 nömrəli körpələr evi-uşaq bağçasına isə bunun üçün cəmi bir il kifayət edib.

Fəaliyyətdə olduğu bu qısa dövr ərzində bağçada yüksək təlim mühiti yaradılıb, işgüzar, yaradıcı fəaliyyət göstərən kollektiv formalaşıb. Həm bunlara, həm də təlim-tərbiyə işlərinin keyfiyyətli təşkilinə, yetirmələrinin hazırlıq səviyyəsinə görə 338 nömrəli bağça hazırda paytaxtın qabaqcıl məktəbəqədər təhsil müəssisələri ilə bir sırada durur. Bunu ötən ay bir yaşını qeyd edən bağçanın bu münasibətlə keçirdiyi bayram şənliyinə gəlmiş qonaqlar - məktəbəqədər təhsil sahəsinin mütəxəssisləri də xüsusi vurğuladılar.

Mərasim iştirakçıları əvvəlcə bağçanı gəzib burada körpə fidanların təlim-tərbiyəsi üçün yaradılmış şəraitlə tanış oldular.

Yeri gəlmişkən qeyd edək ki, bacarıqlı təşkilatçı, ali ixtisas təhsilli Arzu Babayevanın rəhbərlik etdiyi bağçanın binasında ötən il yüksək səviyyədə əsaslı təmir işləri aparılmış, müəssisə müasir avadanlıqlarla, təlim-tədris vəsaitləri ilə və hər cür oyuncaqlarla tam təchiz olunmuşdur. Bütün bunlar, habelə qrup otaqlarının, dəhlizlərin müasir dizayn və metodikanın tələblərinə uyğun zövqlü tərtibatı qonaqlara xoş təsir bağışladı. Sonra onlar bağçanın istedadlı uşaqlarının əl işlərindən və rəsmlərindən ibarət sərgiyə baxdılar. 6 yaşlı Aysel Hüseynovanın burada açılmış fərdi sərgisində nümayiş olunan rəsmlər qonaqlarda heyranlıq doğurdu.

Mərasim Polad Bülbüloğlunun "Azərbaycan" mahnısının sədaları altında al-əlvan geyimli uşaqların zala daxil olması ilə başlandı. Uşaqlardan ibarət xor Dövlət himni və bağçanın himnini ifa etdi.

Sonra aparıcı bağçaları haqqında məlumat verdi. Aydın oldu ki, bu məktəbəqədər təhsil müəssisəsində 9 qrup fəaliyyət göstərir. Onlardan 8-i Azərbaycan, 1-i rus qrupudur. Uşaqlara mövcud proqramdan əlavə, ingilis və ərəb dilləri də öyrədilir. Bu məqsədlə dərnəklər yaradılıb. Burada, eyni zamanda rəqs dərnəyi də mövcuddur.

Uşaqlar Azərbaycan, rus, ingilis, ərəb dillərində şeirlər söyləyir, milli rəqslərimizlə bərabər, rus, hind, ərəb, türk, ingilis rəqslərini də məharətlə ifa edirdilər.

Bu ilin ölkəmizdə "Ekologiya ili" elan olunması ilə bağlı tədbirdə uşaqların ekoloji mövzuda da maraqlı çıxışları oldu. Onlar "Azərbaycan Respublikasının qırmızı kitabı" haqqında məlumat verib qorunan heyvan və bitkilərə aid kompozisiya nümayiş etdirdilər.

Tədbirin sonunda çıxış edən Təhsil Nazirliyi Məktəbəqədər təhsil sektorunun müdiri Nərminə Alnağıyeva, Bakı Şəhəri üzrə Təhsil İdarəsinin sektor müdiri Leyla İmanova, metodist Südabə Abdullayeva, bağça müdirləri və metodistlər fəaliyyətinin bir ilinin tamam olması münasibəti ilə 338 nömrəli bağçanın kollektivini təbrik etdilər, müəssisədə təlim-tərbiyə işlərinin yüksək səviyyədə aparıldığını, əlverişli təlim mühitinin yaradıldığını, pedaqoji kollektivdə yaradıcı, yenilik sevən gənclərin üstünlük təşkil etdiyini qeyd etdilər, belə bir kollektiv formalaşdırdığına, müəssisənin fəaliyyətini qarşıya qoyulan vəzifələrin həllinə bacarıqla istiqamətləndirdiyinə görə bağçanın müdiri Arzu Babayevaya minnətdarlıqlarını bildirdilər.

Mərasimin hazırlanmasında tərbiyəçilər Vüsalə Məmmədovanın, Nəzakət Məmmədovanın, metodist Səidə Əliyevanın, musiqi rəhbəri Elnarə Bədirovanın zəhməti xüsusi qeyd olundu.  

Yusif ƏLİYEV