Aprelin 2-də Azərbaycan Dillər Universitetinin İnformasiya Resurs Kompleksində "Ali təhsil müəssisələrinin KİV-lə əlaqəsi" mövzusunda "dəyirmi masa" keçirildi. ADU-nun İctimaiyyətlə əlaqələr və mətbuat xidmətinin təşəbbüsü ilə Təhsil Nazirliyinin, Azərbaycan Mətbuat Şurasının və Azərbaycan Dillər Universitetinin birgə təşkil etdiyi tədbirdə KİV rəhbərləri və təmsilçiləri, həmçinin ali təhsil müəssisələrinin mətbuat katibləri və nümayəndələri iştirak edirdilər. Öncə ADU-nun İctimaiyyətlə əlaqələr və mətbuat xidmətinin 1 illik fəaliyyətini əks etdirən slaydlar nümayiş etdirildi.

ADU-nun İctimaiyyətlə əlaqələr və mətbuat xidmətinin rəhbəri Zeynəb Kazımova "Ali təhsil müəssisələrinin KİV-lə münasibətlərində mətbuat xidməti: qarşılıqlı əlaqərin qurulmasında peşəkarlıq" mövzusunda məruzə ilə çıxış etdi.

Azərbaycan Mətbuat Şurasının sədri Əflatun Amaşovun  "Mətbuat xidməti və ictimaiyyət: məlumatın hazırlanması və ötürülməsi" mövzusunda məruzəsi maraqla qarşılandı. O, mətbuat xidmətinin hər bir qurumun imicinin formalaşmasındakı rolundan, vəzifələrindən, məlumatın KİV-ə ötürülməsi qaydalarından, həmçinin bu sahədə çalışan insanların jurnalistika və media sahəsində biliklərinin olmasının vacibliyindən danışdı.

"525-ci qəzet"in  baş redaktoru Rəşad Məcid "Universitet nəşrləri: tələbələrin KİV-də iştirakı, tələbə dünyagörüşü və KİV" mövzusunda məruzəsində mətbuatın, qəzetlərin tələbələr üçün hər zaman açıq olmasını və onların peşəkarlıqlarının artırılmasına dəstək vermələrinin önəmini qeyd etdi.

"Yeni Azərbaycan" qəzetinin baş redaktoru Hikmət Babaoğlu mətbuat xidmətlərinin məhz oxucunun marağını nəzərə alaraq materialları daha dəqiqliklə seçib KİV-ə göndərmələrini tövsiyə etdi.

 "Şərq" qəzetinin baş redaktoru Akif Aşırlı çıxışında bildirdi ki, əgər hər hansı strukturun başında peşəkar insan dayanırsa, orada problemlər olmur. Universitetlər içərisində ADU rektorunun bu məsələyə həssaslıqla yanaşması nəticəsində bu təhsil ocağı ilə KİV əlaqələri səmərəli nəticə verir.

 Şakir CƏFƏROV