Aprelin 2-də Bakı Dövlət Universitetində görkəmli alim və ictimai xadim, əməkdar elm xadimi, akademik Abdulla Qarayevin anadan olmasının 100 illiyinə həsr olunmuş yubiley tədbiri keçirilib.

BDU-nun rektoru, akademik Abel Məhərrəmov, xarici işlər naziri Elmar Məmmədyarov, mədəniyyət və turizm naziri Əbülfəs Qarayev və Abdulla Qarayevin ailə üzvləri ilk öncə alimin uzun illər çalışdığı kafedranın önündə barelyefinin, sonra isə akademikin adını daşıyan auditoriyanın açılışında iştirak ediblər.

Sonra tədbir böyük akt zalında davam edib. BDU-nun rektoru, millət vəkili, akademik Abel Məhərrəmov akademik Abdulla Qarayevin çoxşaxəli fəaliyyətindən danışıb. Rektor bildirib ki, 1938-ci ildə təməli qoyulan eksperimental fiziologiya laboratoriyasının ilk təşkilatçılarından biri, tibb elmləri doktoru, professor, Azərbaycan SSR Elmlər Akademiyasının akademiki, əməkdar elm xadimi, 1944-1950-ci illərdə Azərbaycan Dövlət Universitetinin rektoru olmuş, akademik Abdulla Qarayev bütün şüurlu həyatını fiziologiya, biologiya və tibb elmlərinin müxtəlif nəzəri və təcrübi sahələrinin inkişafı işinə həsr etmişdir.

Akademik Abel Məhərrəmov Abdulla müəllimin elmi mühitə çox bağlı insan olduğundan, elə ona görə də həyatının sonuna qədər elmi mühitdən bir an olsa ayrılmadığından, əksinə, onu daha məhsuldar etdiyindən də söz açıb.

Daha sonra rektor Abdulla Qarayevin həyatının çiçəkləndiyi, dolğun enerji və əmək qüvvəsinə malik olduğu bir dövrdə, yaradıcılığının tam inkişafa çatdığı bir mərhələdə, hələ 60 yaşına çatmamış 9 dekabr 1968-ci ildə vaxtından çox tez əbədiyyətə qovuşduğunu tədbir iştirakçılarının diqqətinə çatdırıb. Bildirib ki, onun ən yaxın gələcək üçün hazırladığı real və obyektiv layihələri həll olunmamış qalsa da, zəngin elmi fəaliyyəti bu gün də öyrənilir, tədqiq edilir və tələbələrinin elmi axtarışlarında inkişaf etdirilir.

Tədbirdə lBöyük elmi məktəbin yaradıcısı» məruzəsi  ilə BDU-nun kafedra müdiri, professor Əli Əliyev çıxış edib. O, akademik Abdulla Qarayevin qısa, lakin mənalı ömür yolu keçməsindən danışıb. Çıxışçılar arasında olan akademik Məhərrəm Məmmədyarov isə ilk fizioloq alimin məsləhəti ilə elm yolunu seçdiyi üçün bu gün də ona minnətdar olduğunu bildirib.

AMEA-nın Fiziologiya İnstitutunun direktoru Rafiq Qasımov da çıxışında Abdulla müəllimin çox nadir, həssas insan olduğunu deyərək, onun insan kimi humanist xüsusiyyətlərindən, Azərbaycan elmi istiqamətində gördüyü işlərdən danışıb. Sonra akademik Abdulla Qarayevin ailə üzvləri adından nəvəsi, biologiya elmləri namizədi Vəfa Adıgözəlova çıxış edərək rektor, akademik Abel Məhərrəmov başda olmaqla konfransda çıxış edənlərə və iştirakçılara təşəkkür edib.