Aprelin 7-də Təhsil Nazirliyində Bakıda keçirilən ənənəvi Ətraf Mühitin Mühafizəsi IV Beynəlxalq  Layihə Olimpiadasının (İNEPO-EUROASİA) bir qrup iştirakçısı ilə görüş keçirildi. Görüşdə Türkiyə, Gürcüstan, Polşa, Malayziya, Tailand və b. ölkələrdən gəlmiş müəllim və şagirdlər iştirak edirdilər. Təhsil naziri Misir Mərdanov olimpiada iştirakçılarını salamlayaraq onları ölkəmizdə görməsindən məmnunluq duyduğunu söylədi.

Nazir bildirdi ki, ekologiya və təbiəti mühafizə problemlərinə həsr olunmuş beynəlxalq layihə olimpiadası "Çağ" Öyrətim İşlətmələri Şirkətinin təşəbbüsü və təşkilatçılığı ilə 2007-ci ildən başlayaraq keçirilir və onda iştirak edənlərin sayı ildən-ilə artır. Nazir sayca 4-cü olan builki olimpiadada dünyanın 33 ölkəsindən 300-dək iştirakçının mübarizə apardığını diqqətə çatdırdı.

Misir Mərdanov Təhsil Nazirliyi, Ekologiya və Təbii Sərvətlər Nazirliyi, Dövlət Neft Şirkəti və İctimai Televiziya və Radio Yayımları Şirkətinin dəstəyi ilə keçirilən layihə olimpiadasını ölkəmiz üçün böyük hadisə adlandıraraq onun möhtərəm Prezidentimiz cənab İlham Əliyev tərəfindən 2010-cu ilin Azərbaycanda "Ekologiya ili" elan olunması ilə əlaqədar xüsusi önəm daşıdığını bildirdi. Təhsil naziri olimpiada iştirakçılarına uğurlar arzuladı, bu mötəbər yarışların təşkilində əməyi olan şəxslərə təşəkkürünü bildirdi.

Misir Mərdanov dünyanın müxtəlif ölkələrindən gəlmiş müəllim və şagirdlərə olimpiadada olduqları vaxtdan səmərəli istifadə edib paytaxtımızın görməli yerlərinə baş çəkməyi, Azərbaycan tarixi, milli mədəniyyəti, təhsil sahəsi ilə tanış olmağı tövsiyə etdi.

Görüşdə Gürcüstan, Malayziya və Türkiyədən olan iştirakçılar söz alaraq səmimi qəbul üçün təhsil naziri Misir Mərdanova minnətdarlıqlarını bildirdilər, paytaxtımızla tanışlığın onlarda xoş təəssürat yaratdığını vurğuladılar.

Sonda görüş iştirakçıları nazirə hədiyyələr təqdim edib, onunla xatirə şəkli çəkdirdilər.

Görüşdə "Çağ" Öyrətim İşlətmələri Şirkəti İdarə Heyətinin sədri Ənvər Özərən iştirak edirdi.

Y.ƏLİYEV