Aprelin 3-də ADU-da Azərbaycanda Amerika günləri ilə bağlı tədbir keçirildi. Tədbirdə universitetin rektoru, millət vəkili, professor Səməd Seyidov, Amerika səfirliyinin müvəqqəti işlər vəkili Donald Lu, müəllim və tələbələr, KİV nümayəndələri iştirak edirdilər. ADU-nun  "Gənclər klubu" İctimai Birliyinin, Beynəlxalq Əlaqələr Departamentinin direktoru, eyni zamanda Azərbaycan Dillər Universitetinin beynəlxalq əlaqələr və regionşünaslıq (Amerikaşünaslıq) fakültəsinin tələbəsi Aytac İmanova və "Gənclər klubu" İctimai Birliyinin icraçı direktoru Zaur Əkbər tərəfindən təşkil olunan tədbirdə ADU-nun rektoru Səməd Seyidov çıxış edərək gənclərin rolunu yüksək qiymətləndirdiyini, Azərbaycan Dillər Universitetində yeni mərkəzlərin açılacağını, amerikalı tələbələrin Azərbaycan dilini öyrənmək üçün universitetə gələcəklərini, eyni zamanda yay mövsümündə ADU tələbələrinin Skandinaviya ölkələrinə təhsil almağa gedəcəklərini bildirdi.

Tədbirdə qonaqlar üçün Amerika mətbəxinin cürbəcür nümunələri verildi. Eyni zamanda Azərbaycan xalq incəsənətinə məxsus bir sıra ornamentli kiçik xalçalar, mis qablar nümayiş etdirildi.Yerli və xarici tələbələr müxtəlif musiqili çıxışlar etdilər. Amerika vətəndaşı olan tələbə isə Azərbaycan xalqının milli musiqi aləti sazda mükəmməl ifa nümayiş etdirdi.

Şakir CƏFƏROV