Tələbələrin yüksək təhsil almaları  ilə yanaşı, onların bir  vətəndaş, şəxsiyyət kimi formalaşması işini də diqqət mərkəzində saxlayan Azərbaycan Respublikasının Prezidenti yanında Dövlət İdarəçilik Akademiyasında dekabrın 8-də  Azərbaycanın Milli Qəhrəmanı  Mübariz İbrahimovun xatirəsinə həsr olunan anım mərasimi keçirildi.

Tədbiri akademiyanın Tarix kafedrasının dosenti Firdovsiyyə Əhmədova açaraq Milli Qəhrəman Mübariz İbrahimovun döyüş yolundan danışdı, Azərbaycan gəncliyinin Vətən, torpaq uğrunda canından keçməyə qadir olduğunu bir daha təsdiqləyən nümunə kimi dövlət səviyyəsində təqdir edildiyini diqqətə çatdırdı.

Sonra tanınmış yazıçı-publisist Mustafa Çəmənlinin Mübariz İbrahimovdan  bəhs edən sənədli povestinin təqdimatı oldu. "Mübariz" povesti ali təhsil ocağının müəllim və tələbə heyəti tərəfindən böyük maraqla qarşılandı.

Çıxış üçün söz alan Mustafa Çəmənli qəhrəmanın ömür yolundan söz açaraq əsəri yazarkən yaşadığı hissləri tədbir iştirakçıları ilə bölüşdü.

Çıxış edənlər "Mübariz" povestini gənclərə vətənpərvərlik hissi aşılayan bir əsər kimi dəyərləndirdilər. Mübariz İbrahimovun qəhrəmanlığının dövlət başçısı, cənab İlham Əliyev tərəfindən yüksək qiymətləndirilməsi xüsusi vurğulandı. Çıxışlarda həmçinin Azərbaycanın Milli Qəhrəmanı Mübariz İbrahimovun göstərdiyi igidliyin gənclərdə hərbi  vətənpərvərlik hissinin gücləndirilməsi işində parlaq nümunə, ibrətamiz örnək olduğu qeyd edildi.

Tədbir Azərbaycanın Milli Qəhrəmanı Mübariz İbrahimova həsr olunmuş videoçarxın nümayişi  və ədəbi-bədii kompozisiya ilə başa çatdı. 

Samirə KƏRİMOVA