Dekabrın 3-də ADU-nun rektoru, millət vəkili, professor Səməd Seyidov Polşa Respublikasının Azərbaycana yeni təyin olunmuş fövqəladə və səlahiyyətli səfiri Mikal Labenda ilə görüşdü.

Azərbaycanda diplomatik fəaliyyətə başlaması münasibətilə qonağı təbrik edən rektor xalqlarımız arasında səmimi münasibətlərin olduğunu vurğuladı.   

Görüşdə regional və beynəlxalq, həmçinin bir sıra maraq doğuran məsələlər barədə geniş fikir mübadiləsi aparıldı. Ölkələrimiz arasında bir sıra sahələrdə əməkdaşlığın inkişaf etdirilməsi üçün geniş potensialın olduğunu bildirən səfir Mikal Labenda əlaqələrin dərinləşməsi istiqamətində çalışacağını qeyd etdi.

Rəhbərlik etdiyi təhsil ocağı haqqında məlumat verən Səməd Seyidov bildirdi ki, universitetdə bir çox istiqamətlər üzrə müxtəlif ixtisaslar mövcuddur. ADU-da Qafqazşünaslıq ixtisasının açılmasının qonşu ölkələri öyrənmək baxımından böyük əhəmiyyət kəsb etdiyini deyən rektor Fransa, Almaniya, Koreya, Malayziya mərkəzləri haqqında danışdı. S.Seyidov dövlətçilik ənənələrindən söz açaraq Azərbaycanın beynəlxalq təşkilatlarla apardığı uğurlu əməkdaşlıqdan danışdı. Polşa-Azərbaycan əlaqələrinə toxunan rektor bu münasibətlərin çox yüksək səviyyədə olduğunu bildirdi.

Səfir Mikal Labenda universitetlə gələcək əməkdaşlıq perspektivlərinin olduğunu qeyd edərək Polşa universitetlərində Azərbaycan dilinin tədrisinin mümkünlüyündən söz açdı. Tələbə-müəllim mübadiləsi haqqında danışan səfir Polşa universitetlərində həmçinin Azərbaycan dili kafedrasının açılmasının universitetlərarası əlaqələrə təkan verəcəyini dedi.

Görüşdən sonra səfir Mikal Labenda Azərbaycan Dillər Universitetinin İnformasiya Resurs Kompleksi ilə tanış oldu. 

ADU-nun Mətbuat xidməti