Almaniyada keçirilən "Avromedika-Qannover 2010" beynəlxalq tibb konqresində azərbaycanlı uşaq yazıçı-nağılçısı, Avropa Təbiət Elmləri Akademiyasının həqiqi üzvü Solmaz Amanova "Monastır apteki" kitabına görə Leanardo da Vinçi medalına layiq görülmüşdür.

Leonardo da Vinçi medalı Solmaz Amanovaya Fransada dünyanın ən qədim məbədlərindən birində - Notrdam-su-Terr (X əsr) monastırında təqdim edilmişdir. Nəşr Azərbaycanın ən qədim abidələri - Alban monastırları, Qarabağ və Gəncə xanlıqları haqqında üç kitabdan ibarətdir. Kitablara şeirlər, nağıllar və pyeslər daxildir. Hər kitaba müəllimlər üçün metodik göstərişlər əlavə edilmişdir.

Medal BMT yanında Mükafatlar üzrə Avropa Komitəsində intibah dövrünün dühası Leonardo da Vinçinin 550 illik yubileyi münasibətilə təsis edilmişdir. Fəxri mükafat dünya birliyi, Vətən, qeyri-hökumət təşkilatları qarşısında xüsusi xidmətlərə, rəngkarlıq, memarlıq, ədəbiyyat və digər sahələrdə beynəlxalq aləmdə tanınmış görkəmli əsərlərə görə təqdim olunur.

Solmaz Amanova xaricdə çoxdan tanınır. Onun əsərləri Belarus və Ukrayna dillərinə tərcümə olunmuş, ABŞ-ın Hyuston şəhərində, Almaniyadakı qalereyalarda nümayiş etdirilir, Mədəniyyət və Turizm Nazirliyinin xətti ilə 50-dən çox ölkənin kitabxanalarında saxlanılır.

Bakının orta məktəblərində "İrs" dərnəkləri təşkil olunmuşdur, yazıçının şeir, nağıl və pyesləri öyrənilir və səhnələşdirilir, "İrs" fənni rəsmi olaraq tədris proqramına daxil edilmişdir. "İrs" fənninin müəllifi, Bakı Şəhəri üzrə Təhsil İdarəsinin ibtidai siniflər üzrə metodisti S.Amanova çox xeyirxah nağıllar yazır. O, "Bütün dünyanın mahnıları mənim qəlbimdədir" (Azərbaycan və rus dillərində), "Anatomiya rəngkarlıqda və poeziyada", "Turac" və digər kitabların müəllifidir.

Onun "İrs", "Anatomiya teatrı" kitabları ötən ilin sentyabrında Moskvada keçirilən "Kitab sənəti" beynəlxalq sərgi-müsabiqəsində ikinci və üçüncü yerləri tutmuşdur.

Gələn il "İrs" fənni üzrə daha bir kitab - "Monastır apteki" buraxılacaqdır. Uşaqlar bu kitabdan dərman bitkiləri, tarix, diyarımızın qədim dinləri barədə çox şeylər öyrənəcəklər.

Azərbaycan Prezidenti İlham Əliyev bu kitabları görəndən sonra demişdir ki, Solmaz Amanova şəkillər əsasında yazan yeganə yazıçıdır. Əcnəbi mütəxəssislərin rəyləri və qazanılmış mükafatlar da bunu təsdiq edir.

AzərTAc