İyunun 21-də "Park İnn" mehmanxanasında "Elektron təhsil" müsabiqəsinin yekunları ilə bağlı mərasim keçirildi.

Tədbirdə Təhsil Nazirliyinin məsul işçiləri, Təşkilat Komitəsi və münsiflər heyətinin üzvləri, müsabiqəni dəstəkləyən şirkət və qurumların,  Bakı Şəhəri üzrə Təhsil İdarəsinin, Sumqayıt Şəhər Təhsil Şöbəsinin, bir sıra rayon təhsil şöbələrinin və təhsil müəssisələrinin rəhbərləri, müəllimlər, tələbələr, şagirdlər və KİV təmsilçiləri iştirak edirdilər.

Tədbirdə öncə "Elektron təhsil" müsabiqəsinin təşkili və keçirilməsi ilə bağlı videoçarx nümayiş etdirildi.

Mərasimdə bildirildi ki, Təhsil Nazirliyinin təşəbbüsü ilə təşkil edilən müsabiqəyə aprelin 6-dan start verilib. "2008-2012-ci illərdə Azərbaycan Respublikasında təhsil sisteminin informasiyalaşdırılması üzrə Dövlət Proqramı" çərçivəsində həyata keçirilən müsabiqə "Microsoft Azərbaycan", "İntel" korporasiyasının "Gələcək üçün təhsil" proqramı, "AZEDUNET", "Ultra", HP, "Azerfon-Vodafone" və "Mədəd" təşkilatları tərəfindən dəstəklənib.

Sonra çıxış üçün söz Azərbaycan Respublikasının təhsil naziri Misir Mərdanova verildi. 2010-cu ilin Təhsil Nazirliyi tərəfindən "Təhsildə İKT ili" elan edildiyini xatırladan Misir Mərdanov keçən müddət ərzində İKT ilə bağlı silsilə tədbirlərin həyata keçirildiyini dedi və bugünkü mərasimin həmin tədbirlərin ən önəmlisi olduğunu vurğuladı. Nazir təklifi qəbul edib müsabiqənin keçirilməsində yaxından iştirak edən bütün təşkilat və şirkətlərə Azərbaycanın təhsil ictimaiyyəti adından təşəkkürünü bildirdi. Nazir bu müsabiqədə rəqabətin gözlənildiyindən də yüksək olduğunu və qısa müddət ərzində 1475 nəfərin qeydiyyatdan keçdiyini, onların arasında müəllimlərin çoxluq təşkil etdiyini diqqətə çatdırdı. Şagirdlərin də bu işdə fəal iştirak etməsi faktını Azərbaycanın inkişafının göstəricisi kimi dəyərləndirdi. Nazir Misir Mərdanov qeyd etdi ki, müsabiqədə Bakı və Sumqayıtla yanaşı, respublikanın digər bölgələri də təmsil olunub.

Təhsil naziri çıxışının sonunda ayrı-ayrı nominasiyalar üzrə bütün qalibləri təbrik edərək onlara gələcək fəaliyyətlərində yeni-yeni nailiyyətlər və şəxsi həyatlarında uğurlar arzuladı.

Verilən məlumata görə, iki istiqamət üzrə təşkil edilən müsabiqədə təhsil müəssisələrində çalışanlar və müəllimlərin təkmilləşdirilməsi ilə məşğul olanlar, valideynlər, şagirdlər, həmçinin pedaqoji ali təhsil müəssisələrinin tələbələri və aspirantları iştirak edib. İştirakçıların və istifadəçilərin daha çevik və effektiv münasibətlər qurması üçün müsabiqənin İnternet resursu hazırlanıb. (www.musabiqe.edu.az) İlk dəfə olaraq istifadəçilər üçün onlayn müzakirə imkanları yaradılıb.

1500-ə yaxın sənəd qeydiyyatdan keçsə də, müsabiqədə yalnız 810 layihə iştirak etmiş, onların arasından 5 nominasiya üzrə 89 nominant seçilmişdir.

"Müasir məktəbdə elektron tədris resursları" istiqaməti üzrə müsabiqəyə elektron tədris resurslarının tədris prosesində əməli tətbiqinə aid olan metodiki tədris materialları təqdim edilib. Qaliblər "Fənlərin tədrisində informasiya texnologiyalarından istifadə üzrə ən yaxşı metodika", "İbtidai təhsil sistemində informasiya texnologiyalarından istifadə üzrə ən yaxşı metodika" və "Elektron tədris vəsaitlərindən istifadə edilməklə qurulan tədris prosesinin ən yaxşı modeli" nominasiyaları üzrə müəyyən olunub. "Təhsildə İnternet texnologiyaları" istiqaməti üzrə müsabiqəyə təhsil məzmunlu İnternet resursları, bloqlar və digər İnternet layihələri təqdim edilib. Qaliblər "Təhsildə İnternet resursları"  və  "Müəllimlərin  bloqları" nominasiyaları üzrə müəyyən olunub.

Münsiflər heyəti adından çıxış edən Azərbaycan Milli Elmlər Akademiyasının Kibernetika İnstitutunun əməkdaşı Elxan Səbziyev qaliblərin seçilməsi prosesi haqqında ətraflı məlumat verdi. Daha sonra mükafatların təqdim olunması mərasimi keçirildi. 5 nominasiyanın hər biri üzrə qaliblərə diplomlar, xüsusi mükafatlar təqdim olundu. Müsabiqənin qalibləri və həvəsləndirici mükafatlara layiq görülənlər təhsil naziri ilə xatirə şəkli çəkdirdilər.

Hicran ƏKBƏROVA