Rusiya Federasiyasının Dövlət Duması Vahid Dövlət İmtahanının keçirilməsi prosedurunu nizamlamağa yönəlmiş qanun layihəsini ilk oxunuşda qəbul edib.

"Təhsil haqqında", "Ali və ali məktəbdənsonrakı peşə-ixtisas təhsili haqqında" qanunlara düzəlişlər müvafiq orqanın - RF-nin prezidenti yanında VDİ keçirilməsinin təkmilləşdirilməsi üzrə Komissiyanın işinin nəticəsidir.

Vahid imtahanın nəzarət-ölçü materialları məxfi informasiya sayıldığından qanun layihəsində onların mühafizəsi  üzrə  işlərin  təşkili  nəzərdə tutulur.

İctimai müşahidəçilərin statusunu və məktəblilərin dövlət yekun attestasiyasının keçirilməsində onların hüquqlarını müəyyənləşdirən Əsasnamə tətbiq edilir. Onlar aşkar edilmiş pozuntular  haqqında  dövlət  imtahan  komissiyasına  və  regional  təhsil  nazirliklərinə  informasiya  göndərə bilərlər.

Dövlət Dumasının təhsil üzrə Komissiyasının sədri Qriqori Balıxinin verdiyi məlumata görə, ictimai müşahidəçilərin akkreditasiya qaydalarını RF Təhsil və Elm Nazirliyi hazırlayacaq. Onun fikrincə, bu zaman "valideyn  övladının VDİ verdiyi məntəqədə müşahidəçi olmamalıdır. Bu, Vahid Dövlət İmtahanının verilməsində obyektivliyi təmin etmək üçündür".

Hazırladı: Y.ƏLİYEV