Bakıdakı 242 nömrəli orta məktəbdə sinifdənxaric işlərə geniş  yer  verilir. Məktəbin direktoru  Akif Rəsulov bildirdi ki,  sinifdənxaric tədbirlər təlim-tərbiyə işinin tərkib hissəsidir. Dərslə sinifdənxaric işlər qarşılıqlı əlaqədə olmaqla biri digərini tamamlayır və bir vəhdət halında elmlərin əsaslarının şagirdlər tərəfindən dərindən mənimsənilməsinə, onların əqli, fiziki, estetik, vətənpərvərlik tərbiyəsinin inkişafına xidmət edir. Həm də sinifdənxaric tədbirlər şagirdlərin biliyə marağını artırır, onların bilik, bacarıq və vərdişlərini genişləndirir, şüurlu intizamı, kollektivçiliyi, təşəbbüskarlığı və təşkilatçılıq məsuliyyətini inkişaf etdirir.

Təhsil ocağında   dərslə yanaşı, sinifdənxaric işlərin yüksək səviyyədə  aparılması üçün hər cür şərait yaradılıb. Müəllimlər həmin şəraitdən maksimum dərəcədə istifadə olunmasına çalışmaqla,  qazandıqları nailiyyətləri artırıb möhkəmləndirirlər. Vaxtaşırı məktəbdə keçirilən tədbirlərin qabaqcadan planlaşdırılmasında da müəllimlərdən Aybəniz Vəliyeva, Səmarə Məmişova, Mehriban Vəliyeva və Bəyim Əliyeva böyük səy göstərirlər.    

Şakir CƏFƏROV