"Cisco" şirkəti və "Monitor Group" təşkilatının mütəxəssisləri "The Evolving Internet" ("İnkişaf edən İnternet") hesabatı çərçivəsində İnternetin inkişafına dair dörd mümkün tendensiya proqnozlaşdırmışlar.

AzərTAc xarici KİV-lərə istinadla xəbər verir ki, "Fluid frontiers" ("Süzgün sərhədlər") adlanan birinci ssenaridə İnternetin daha geniş yayılacağı və qlobal şəbəkənin rolunun son dərəcə əhəmiyyətli olacağı bir dünya təsvir olunur. Bu halda dünyada İnternet-sahibkarlığın artımı gözlənilir. Bunun nəticəsində çoxlu sayda yeni texnologiya meydana çıxacaqdır.

İkinci tendensiya "Insecure growth" ("Etibarsız artım") adlanır. Burada istifadəçilərin və təşkilatların kiberhücumlar fonunda təhlükəsizliyinin zəifləməsi proqnozlaşdırılır. Təhlilçilər hesab edirlər ki, qlobal şəbəkənin "Etibarsız artım" ssenarisi üzrə inkişaf edəcəyi təqdirdə İnternetin nisbətən daha təhlükəsiz, lakin ödənişli və olduqca baha alternativləri meydana gələcəkdir.

İnternetin təkamülünün daha bir variantı kimi ekspertlər "Short of the promise", yəni "Vədlərin özünü doğrultmaması" təmayülünü qeyd etmişlər. Burada uzun sürən iqtisadi durğunluğun bir çox ölkədə qlobal şəbəkənin də inkişafına təsir göstərəcəyi gözlənilir. Belə vəziyyətdə mürəkkəb iqtisadi vəziyyət və dövlətlərin proteksionist siyasəti şəbəkənin artımını və innovasiyaların əmələ gəlməsini xeyli ləngidəcəkdir.

Nəhayət, ekspertlər İnternetin öz uğurlarının qurbanı olacağı bir ssenari üzrə də inkişaf edəcəyini istisna etmirlər. Mütəxəssislərin "Bursting at the seams" ("Genişlənib partlamaq") adlandırdığı həmin ssenarinin baş verəcəyi halda, müxtəlif veb-servislərə tələbat o dərəcədə artacaqdır ki, informasiya və rabitə texnologiyaları sadəcə olaraq trafik axını ilə bacarmayacaqlar.

"Evolving İnternet" hesabatının müəlliflərinin fikrincə, gələcəkdə İnternetin idarəolunma sistemində elə də güclü dəyişikliklər müşahidə olunmayacaqdır. Bununla yanaşı, ödəmə tariflərinin çoxalacağı proqnozlaşdırılır.

Əsas artımın yaxın 15 il ərzində İnternetin istifadə səviyyəsinin bu gün o qədər də yüksək olmadığı inkişaf edən ölkələrin payına düşəcəyi gözlənilir.