Xəbər verildiyi kimi, Təhsil Nazirliyinin 2010-2011-ci tədris ili üçün ölkənin ümumtəhsil məktəblərində həvəsləndirmə tədbirləri tətbiq ediləcək vakant yerlər haqqında elanı mətbuatda dərc olunub. Həmin yerlərdə işləmək istəyən pedaqoji ixtisaslı gənc mütəxəssislər sentyabrın 15-dək nazirliyə müraciət edə bilərlər.

Məlum olduğu kimi, Nazirlər Kabinetinin "Pedaqoji profilli ixtisaslar üzrə ali və orta ixtisas təhsili müəssisələrini bitirmiş və ümumi təhsil müəssisələrində işə başlamış gənc mütəxəssislər üçün əlavə güzəştlər və stimullaşdırıcı tədbirlərin müəyyən edilməsi haqqında" 14 aprel 2010-cu il tarixli, 67 nömrəli qərarına əsasən əvvəlki illərdə gənc mütəxəssislərə tətbiq olunan maliyyə vəsaitləri artırılmış, onlara ipoteka kreditlərinin verilməsi də nəzərdə tutulmuşdur. Güzəştlər dövlət sifarişinə əsasən iş yerlərində əmək fəaliyyətinə başlayan və 3 il müddətində bu fəaliyyəti ümumi təhsil müəssisələrində davam etdirən pedaqoji profilli ali və orta ixtisas təhsili müəssisəsini bitirmiş gənc mütəxəssislərə şamil edilir. Həmin gənclərə yol, əmlakın daşınması üçün nəqliyyat xərcləri, ilkin yaşayış şəraitinin yaradılması məqsədi ilə əməkhaqqının iki misli həcmində birdəfəlik yardım, 3 il müddətində kommunal xidmət xərclərini ödəmək üçün ayda 40 manat məbləğində kompensasiya veriləcəkdir. Həmçinin işə yeni başlayanların yaşayış sahələrinə ehtiyacları ödəniləcək, onlara torpaq sahələri ayrılacaq, ipoteka krediti veriləcəkdir.

Rayon mərkəzlərindən 20 kilometrdən çox məsafədə yerləşən ümumi təhsil müəssisələrində əmək fəaliyyətinə başlayan hər bir müəllimə qeyd edilən həvəsləndirmə tədbirləri ilə yanaşı, həm də 3 il müddətində 70 manat məbləğində aylıq əməkhaqqına əlavə ödəniləcəkdir. Başqa sözlə, 20 kilometrədək məsafədə yerləşən məktəblərdə fəaliyyət göstərənlərə ayda 40, 20 kilometrdən çox məsafədə yerləşən məktəblərdə dövlət sifarişinə uyğun işləyənlərə ayda 110 manat maliyyə vəsaiti ödəniləcəkdir.   

Y.ƏLİYEV