Azərbaycan Respublikası Təhsil Nazirliyi Azərbaycan Müəllimlər İnstitutunun bazasında "Təhsilin əsasları" fənnindən dərs deyən ali məktəb müəllimləri üçün 2010-cu il avqustun 23-dən kurs təşkil edib. Dərsləri Təhsil Nazirliyinin aparıcı məsləhətçisi Afət Süleymanova aparır. Kursun dinləyiciləri Azərbaycan Müəllimlər İnstitutunun və onun filiallarının, Azərbaycan Dövlət Pedaqoji Universitetinin və Gəncə Dövlət Universitetinin müəllimləridir.

Kursun gündəliyində təhsil üzrə kadr hazırlığının bakalavr pilləsinin V semestrində tədris ediləcək "Kurikulum və təlimin əsasları" fəsli durur. Bu fəsildə təhsil proqramlarının (kurikulumlarının) strukturu və məzmunu; fənn proqramlarının (kurikulumlarının) tətbiqində yeni təlim strategiyaları və təlimin təşkilində onlardan səmərəli istifadə yolları; təlimin təşkilində İKT-dən istifadənin imkanları; ümumi təhsil sistemində yeni qiymətləndirmə mexanizmlərinin tətbiqi; yeni dərsliklər və onlarla işin xüsusiyyəti kimi məsələlər öz əksini tapır.

Kursda həmçinin müəllimin dərs prosesində istifadə etdiyi yeni təlim metodları və üsulları haqqında məlumatlar verilir, dərsin iştirakçıları müəyyən mövzuları hansı üsullarla tədris edəcəklərini nümayiş etdirirlər. Dərs prosesində dinləyicilər qruplara bölünür, fikir mübadiləsi aparılır, qruplar arasında mübahisələr və onların həlli yolları müəyyənləşdirilir. Ənənəvi tədris üsullarından fərqli olaraq dinləyicilər müəyyən mövzuları öz həmkarlarına təqdim etməklə müəllim rolunu ifa edirlər.

"Təhsilin əsasları" fənninin ali pedaqoji təhsil müəssisələrinin ikinci kursunda tədrisi prosesində daha çox təhsil fəlsəfəsi, təhsildə dövlət siyasəti, təhsilin hüquqi əsasları müzakirə edilib öyrədilirdisə, hazırkı kursda əsasən orta təhsil kurikulumu, tədris prosesinin şəxsiyyətyönümlülüyü, nəticəyönümlülüyü, şagirdyönümlülüyü, tələbəyönümlülüyü, inteqrativlik və subyektlər münasibəti açıqlanır.

Dinləyicilərlə aparılan söhbətlərdən aydın olur ki, institutumuzda bu il təşkil olunmuş seminar keçən illə müqayisədə daha maraqlı keçirilir. Bunun da əsas səbəblərindən biri dinləyicilərin birinci mərhələnin materiallarını bilməsi və müəllim hazırlığında II kursda onlardan istifadə edilməsidir.

Tədrisin bu şəkildə qurulması Azərbaycan təhsil sisteminin Avropa təhsil sisteminə inteqrasiyasına kömək edir, təhsil prosesinin təşkilinə və onun idarə edilməsinə öz müsbət təsirini göstərir. 

Məleykə MƏMMƏDOVA,
Azərbaycan Müəllimlər İnstitutunun əməkdaşı