Bakının  Nizami rayonundakı Uşaq-Gənclər  Yaradıcılıq  Mərkəzinin istedadlı və bacarıqlı  dərnək üzvləri  Ukraynanın  Krım vilayətində yerləşən "Artek" Beynəlxalq Uşaq Mərkəzində IX Beynəlxalq Uşaq Festivalında iştirak ediblər.

Mərkəzin direktoru Lalə Qətinin bildirdiyinə görə, kollektiv "Ümid və xeyirxahlıq" Ümumukrayna  fondunun təşkilatçılığı, Ukrayna Gənclər Nazirliyinin dəstəyi ilə "Dünyanı yaxşılığa doğru dəyişək" devizi altında  55 ölkənin  uşaq kollektivlərinin iştirak etdiyi festivalda  Azərbaycanı təmsil edib. Festivalın təşkilində əsas məqsəd dünyanı sülhə səsləmək və müharibə törədilən ölkələrdə  əzab çəkən uşaqların  harayına səs verib, bu müharibələrin qarşısını almaq, uşaq hüquqlarını müdafiə etmək, bütün dünyada ekologiyanı qorumaq və s. olmuşdur. Mərkəzin dərnək üzvləri festivalın proqram çərçivəsindəki bədii proqramlarda, konsertlərdə və yarışmalarda xüsusi fəallıq göstəriblər. "Ölkə günü" başlığı altında  keçirilən tədbirdə uşaqlar  ölkəmiz,  onun mədəniyyəti və incəsənəti, folkloru və s.haqqında  məlumatları, Təhsil Nazirliyi və Heydər Əliyev Fondu tərəfindən verilmiş  materialları - Azərbaycan haqqında  albom, buklet və diskləri festival iştirakçılarına çatdırıblar. Mərkəzin yetirmələrinin  əl işlərindən ibarət sərgi böyük maraqla qarşılanıb.

Festivalın "Sülh günü" tədbirində isə  müxtəlif ölkələrdən olan uşaqlar sülh və əmin-amanlıq barədə arzularını ifadə edib, 55 dövləti təmsil edən sülh elçiləri dünya ölkələrinin rəhbərlərinə müraciət qəbul ediblər. Dərnək üzvlərinin göstərdikləri uğurlar festival təşkilatçıları tərəfindən fəxri fərmanlar və diplomlarla qiymətləndirilib.  Mərkəzin direktoru Lalə Qətiyə  isə ən yaxşı qrup liderliyinə görə sertifikat təqdim olunub.

Vətənimizi təmsil edən festival iştirakçıları xoş təəssüratla  Azərbaycana  qayıdıblar. 

Sifai SƏFƏROVA