Bakı Şəhəri üzrə Təhsil İdarəsindən aldığımız məlumata görə, 2009-2010-cu tədris ilində bu qurumun tabeliyində olan təhsil müəssisələrində təmir, tikinti və maddi-texniki bazanın möhkəmləndirilməsi istiqamətlərində bir çox işlər görülüb. Belə ki, Təhsil Nazirliyinin xətti ilə 2 məktəb üçün əlavə tədris korpusu tikilib. 14 məktəbdə və 8 körpələr evi-uşaq bağçasında əsaslı təmir işləri aparılıb. Bundan əlavə, 12 məktəb və 10 məktəbəqədər təhsil müəssisəsinin binaları cari təmir olunub.

Hər il olduğu kimi, bu il də Heydər Əliyev Fondu paytaxtın təhsil müəssisələrinin maddi-tədris bazasının möhkəmləndirilməsinə öz töhfəsini verib. Fondun xətti ilə 3 məktəb əsaslı təmir olunub.

Paytaxtın təhsil müəssisələrində istilik sisteminin qaydaya salınması da diqqət mərkəzində olub. Ötən dərs ili və yay tətili ərzində 13 məktəbin və 10 uşaq bağçasının istilik sistemi əsaslı şəkildə təmir olunaraq saz vəziyyətə gətirilib.

Y.ƏLİYEV