Yaz aylarında yağan güclü leysan yağışları və Kür çayında suyun səviyyəsinin qalxması nəticəsində üzə çıxan suxur suları Kürdəmir rayonunun Kürqırağı ərazisində yerləşən Carlı kəndində də xeyli fəsadlar törətmişdir. Prezident İlham Əliyevin respublikamızda baş vermiş təbii fəlakətin nəticələrinin aradan qaldırılması, əhaliyə dəymiş maddi ziyanın ödənilməsi ilə əlaqədər verdiyi tapşırıqlara əsasən, hər yerdə olduğu kimi, Kürdəmirdə, o cümlədən Carlı kəndində genişmiqyaslı işlərə başlanmışdır. Kənddə təbii fəlakət nəticəsində uçmuş və ya qəzalı vəziyyətə düşən 5 fərdi ev ilə yanaşı, həm də yararsız vəziyyətdə olan kənd orta məktəbi üçün də yeni bina inşa olunur. Dövlət vəsaiti hesabına tikilən yeni məktəb binası 10 sinif otağından ibarət olacaqdır.

İndi burada hörgü işləri aparılır. Tədris ocağı üçün yeni binanın cari ilin noyabr ayınadək tikilib istifadəyə verilməsi nəzərdə tutulmuşdur.

AzərTAc