Sentyabrın 1-də Heydər Əliyev Fondu Ulyanovsk şəhərinə müasir məktəb binası hədiyyə etmişdir.

Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyevanın təşəbbüsü ilə, şəxsən onun nəzarəti altında "Təhsilə dəstək" layihəsi çərçivəsində Ulyanovsk şəhərindəki 78 nömrəli orta ümumtəhsil məktəbinin binası əsaslı təmir edilmişdir. Bu aksiya fəaliyyət istiqamətlərindən biri Azərbaycanın digər dövlətlərlə humanitar əlaqələrinin möhkəmlənməsinə, respublikamızın və xarici ölkələrin təhsil müəssisələri ilə sıx əməkdaşlığın genişlənməsinə, ölkəmizdə və onun hüdudlarından kənarda məktəblərin tikintisinə və yenidən qurulmasına kömək etmək məsələlərindən ibarət olan Fondun fəaliyyəti ilə ahəngdar şəkildə uzlaşır.

Məktəbin rəsmi açılış mərasimində Ulyanovsk vilayətinin rəhbərləri, Azərbaycanın RF-dəki səfiri Polad Bülbüloğlu, Heydər Əliyev Fondunun icraçı direktoru Anar Ələkbərov, eləcə də Ümumrusiya Azərbaycanlıları Konqresinin Ulyanovsk regional bölməsinin nümayəndələri iştirak etmişlər.

Təntənəli mərasimdə məktəbin Ulyanovsk vilayətinin qubernatoru Sergey Morozov və məktəbin direktoru Gennadi Tsaryov Ulyanovsk sakinlərinə bu dəyərli hədiyyəyə görə Heydər Əliyev Fonduna dərin minnətdarlığını bildirmişlər.

Mərasimdə Azərbaycanın RF-dəki səfiri Polad Bülbüloğlu çıxış edərək Fondun çoxşaxəli fəaliyyəti və onun humanitar sahədə həyata keçirdiyi genişmiqyaslı layihələr barədə ətraflı söhbət açmışdır.