Məmmədov Camal Muxtar oğlu 1992-ci ildə Sumqayıt şəhərində dünyaya göz açıb. 2008-ci ildə Sumqayıt şəhər 33 nömrəli orta məktəbin IX sinfini bitirdikdən sonra Sumqayıt 1 nömrəli Peşə Liseyinə qəbul olub. Hazırda həmin təhsil ocağının kompüter avadanlığının istismarı üzrə operatoru qrupunun III kursunda təhsilini davam etdirir. Yaxşı oxuması, nümunəvi davranışı ilə müəllimlərinin və şagird yoldaşlarının dərin hörmətini qazanan Camal təhsil aldığı peşə liseyinin idman yarışlarında iştirak etməklə yanaşı, idman ustası Natiq Qasımovun fəaliyyət göstərdiyi cəmiyyətdə mütəmadi olaraq kikboksinq idman növü üzrə məşqlərini davam etdirir.

Hələ uşaqlıqdan idmanın bu növünə böyük maraq göstərən Camal erkən yaşlarından bu yolda uğurlar qazana bilib. Belə ki, bir neçə dəfə respublika birinciliyinin qalibi olub.

Camal tanınmış idmançı olmağı, mötəbər turnirlərdə qələbə qazanaraq təmsil etdiyi müstəqil Azərbaycan Respublikasının bayrağını qaldırmağı qarşısına məqsəd qoymuşdur. Bu arzusuna çatan Camal Məmmədov 2006-cı ildə Yunanıstanda dünya kuboku uğrunda yeniyetmələr arasında keçirilən çempionatda uğurla iştirak edib və doğma şəhəri Sumqayıta qızıl medalla qayıdıb. 2008-ci ildə Gürcüstanda keçirilən yarışlarda yüksək nəticələr göstərən Camal Azərbaycana 2 qızıl kəmər, 2 qızıl və 2 gümüş medal gətirib.

2010-cu il sentyabrın 20-dən 27-dək Serbiyanın Belqrad şəhərində yeniyetmələr arasında keçirilən dünya kuboku uğrunda yarışlar Camal üçün daha əlamətdar olub. Bu çempionatda 65 ölkənin idmançıları təmsil olunurdu. 2002-ci ildən kikboksinq idman növü ilə həvəslə məşğul olan Camal həmin çempionatda öz sözünü qətiyyətlə deyə bilib. Belə ki, rəqibləri olan erməni, özbək, macar və rus idmançılarına qalib gələrək ikiqat dünya çempionu titulunu qazanmış və gənclik şəhəri Sumqayıta qızıl medalla qayıtmışdır.

Dünya çempionunu Sumqayıt Şəhər Gənclər və İdman Baş İdarəsinin rəisi Musa Həsənov qəbul edərək onu təbrik etmiş və qiymətli hədiyyə ilə mükafatlandırmışdır.

Həmçinin təhsil aldığı Sumqayıt 1 nömrəli Peşə Liseyinin pedaqoji-mühəndis kollektivi Camal Məmmədovu hərarətlə qarşılamış və əminliklə bildirmişlər ki, bu tədris ilini o, uğurla başa vuraraq Azərbaycan Dövlət Bədən Tərbiyəsi və İdman Akademiyasının tələbəsi kimi təhsilini davam etdirəcək.

Nizami MİRZƏ