Noyabrın 18-də Azərbaycan Respublikasının Prezidenti yanında Dövlət İdarəçilik Akademiyasında "İnvestisiya proseslərinin dövlət  tənzimlənməsi və  dövlətin maliyyə-kredit siyasəti" istiqaməti üzrə növbəti qısamüddətli kursların açılışı olub.

Tədbiri giriş sözü ilə DİA-nın tədris işləri üzrə prorektoru, professor Ə.Abdullayev açaraq  bu kursların gənc kadrların  yetişdirilməsi  baxımından böyük  önəm daşıdığını qeyd edib və dinləyicilərə öz  səmimi arzularını bildirib.

Kurslarda dövlət hakimiyyətinin mərkəzi, şəhər, rayon miqyaslı orqanlarının, müvafiq nazirlik, komitə və idarələrin rəhbər işçiləri ilə yanaşı, əcnəbi  qonaqların iştirakı nəzərdə tutulub.

Asiya İnkişaf Bankının dəstəyi və vasitəçiliyi ilə ölkəmizə təşrif gətirən həmin qonaqlar sırasında Sinqapurun Li Kuanyu  Dövlət Siyasət İnstitutunun mütəxəssisi Aydjerim Bolat, Asiya İnkişaf Bankı ilə  əməkdaşlıq üzrə regional ekspert Devid Oldfild və başqaları da  vardır .

DİA-da təşkil olunan bu  kursların əsas məqsədi dövlətin iqtisadi sahədə apardığı islahatlar, maliyyə-kredit siyasəti, investisiya qoyuluşu proseslərində dövlətin tənzimləmə metodları və s.  barədə dinləyicilərə  yeni  biliklərin verilməsi və dünya təcrübəsinin  öyrədilməsidir.  

Ş.CƏFƏROV