Neftçala rayonunda oktyabrın 20-dən noyabrın 20-dək "Uşaq hüquqları" aylığı keçirilir. Aylıq çərçivəsində  bütün təhsil müəssisələrində  konfranslar, seminarlar, disputlar, mühazirələr keçirilir, "açıq dərs"lər  və sinif saatları  təşkil olunur. Məşğələlərdə Uşaq Hüquqları Konvensiyasının müddəaları haqqında şagirdlərə ətraflı  məlumatlar verilir. Aztəminatlı ailələrin, xüsusi qayğıya ehtiyacı olan uşaqların kütləvi tibbi müayinələri aparılır, sağlam  həyat tərzinin təbliğinə  xüsusi diqqət yetirilir. Uşaqları neqativ  vərdişlərdən çəkindirmək istiqamətində hüquq-mühafizə orqanları ilə birlikdə  mütəmadi  maarifləndirici tədbirlər  təşkil edilir.

Aylıq çərçivəsində "Uşaq hüquqları hamı üçün" mövzusunda  inşa yazı müsabiqəsi keçirilib. Müsabiqədə Bankə qəsəbə  I nömrəli orta məktəbin XI sinif şagirdi Gülçin Hadıyeva və Xıllı qəsəbə I nömrəli orta məktəbin X sinif şagirdi  Fəridə Sultanova I,  şəhər 2 nömrəli, eləcə də  Mirqurbanlı, Qədimkənd və Xolqarabucaq kənd orta məktəblərinin şagirdləri II,  şəhər  1 və 4 nömrəli məktəblərin,  Muğan liseyi və Həsənabad qəsəbə orta məktəbinin şagirdləri III və IV yerləri tutublar.

"Bizim hüquqlarımız" mövzusunda keçirilən rəsm müsabiqəsində  isə  I yeri  Qədimkənd  orta məktəbinin, II və III  yerləri şəhər 1,2 və 4 nömrəli məktəblərin, Muğan liseyinin, Xıllı qəsəbə I  nömrəli və Xolqarabucaq kənd orta məktəblərinin şagirdləri qazanıblar.   

S.SƏFƏROVA