Nağıl uşaq dünyasının mənəvi sərvəti, uşaq təxəyyülünün əbədi qaynağıdır. Tarixin bütün dövrlərində nağıl dinlənilir, uşaq bədii fondunu zənginləşdirir. Nağıllar bu gün də uşaq mütaliəsində xüsusi yer tutur.

Bu tələbi nəzərə alan ibtidai sinif şagirdləri və məktəbəqədər azyaşlı uşaqlar üçün "Göyərçin" jurnalının əməkdaşları mətbu orqanın hər nömrəsində həm Azərbaycan, həm də dünya xalqlarının nağıllarına yer ayırırlar.

Təqdirəlayiq haldır ki, jurnalda çap olunmuş hekayə və nağıllar sonradan rəngli şəkillərlə ayrıca kitabçalar şəklində nəşr olunur. "Elm və helm" - "Göyərçin"in kitabxanası" seriyasından "Azərbaycan" nəşriyyatının mətbəəsində buraxılmış hekayə və ədəbi nağıllar bu ad altında toplanmışdır. Burada uşaq yazıçısı,  filoloq alim Rafiq Yusifoğlunun 13 qələm məhsulu verilmişdir. Uşaq psixologiyasını, təbiətin əsrarəngizliyini əks etdirən bu əsərlər maraqla oxunur.

Dünya xalqlarının nağıllarından ibarət 10 yazı toplanmış "Möcüzəli ağac" adlı topluda İsveç, hindu, fars və b. xalqlara məxsus folklor nümunələri verilmişdir (tərcüməçi R.Yusifoğludur).

Ş.ELNUR