Avropa Təhsil Siyasəti Şəbəkəsi Mərkəzi (NEPC) iyunun 27-dən iyulun 2-dək Gürcüstanda "Müasir dövrdə liderlik: keçid dövrünü yaşayan cəmiyyətlərdə təhsil liderliyi" mövzusunda yay məktəbi təşkil etmişdir. Məktəbə 12 ölkənin - Azərbaycan, Gürcüstan, Rumıniya, Xorvatiya, Slovakiya, Estoniya, Türkiyə, Nepal, Monqolustan, ABŞ, İrlandiya və Braziliyanın nümayəndələri dəvət olunmuşdu.

Bazaleti gölü sahilində keçirilən məktəbin iştirakçıları həm təbiətin gözəlliyindən, həm də məktəbin səmərəli təşkilindən çox məmnun qaldılar. Zaqrebdə yerləşən NEPC təşkilatının icraçı direktoru Lana Jiriko, proqram meneceri Asya Korbar, amerikalı mühazirəçilər Katrin Maqno, Lystra Riçardson, Azərbaycandan Müasir Təhsil və Tədrisə Yardım Mərkəzinin proqramlar üzrə direktoru Elmina Kazımzadə iştirakçıları çox səmərəli müzakirələrə və təqdimatlara cəlb etdilər.

Yay məktəbində müasir dövrdə yeni təhsil siyasətində kurikulumun inkişafı, məktəb liderliyi və onun idarəolunması, təlimin demokratik şəkildə təşkili, məktəb-valideyn birliyi və onun prinsipləri, məktəb liderlərinin yaradılması və məktəbin sistemli, müasir standartlarla idarə olunması və digər mövzularda maraqlı müzakirələr və təqdimatlar oldu.

Keçirilən təqdimatlar sorğu və diskussiya xarakteri daşımaqla iştirakçıları maraqlandıran problemləri əhatə etdi. Katrin Maqno və  Lystra Riçardsonun sırf liderlik mövzularına aid təqdimatlarında liderliyin tipləri, yaradılması yolları, prinsipləri, təhsildə oynadığı mühüm rol qeyd olundu və təcrübi xarakterli videofilmlər nümayiş etdirildi.

İştirakçılar liderlik tipləri və bacarıqları üzrə müəyyən inventorları nəzərdən keçirərək öz liderlik tiplərini müəyyən etdilər, öz fəaliyyət və bacarıqları sayəsində hansı dəyərlərin qazanılması və yüksək nəticələr əldə edilməsi yollarını müəyyənləşdirdilər.

Təhsil Nazirliyinin Strateji təhlil, planlaşdırma və kadrların idarəolunması şöbəsinin aparıcı məsləhətçiləri Vüqar Əbdülrəhimov və Natiq Əliyev müzakirələrdə fəal iştirak edərək təhsilin idarə olunması sahəsində qarşıya çıxan problemlər və liderlik siyasəti ətrafında keçirilən suallara dolğun cavablar verdilər. Müasir Təhsil və Tədrisə Yardım Mərkəzinin proqramlar üzrə direktoru Elmina Kazımzadə Azərbaycan təhsilində əldə olunan uğurları, aparılan təhsil islahatının müsbət cəhətləri və həll olunacaq problemlər haqqında məlumat verərək, "Təhsildə liderlik mövzusunda ölkələr üzrə araşdırmalar" mövzusunda çox mükəmməl və maraqlı bir təqdimat keçirərək iştirakçıları ətraflı müzakirəyə cəlb etdi. Elə həmin mərkəzin beynəlxalq dərəcəli təlimçisi və Liderlik-Administrasiya üzrə Amerika Universitetinin məzunu Raziyə İsayeva özünün fərqli fikirləri ilə çıxışlar edərək təhsildə uğurlu nəticələrin qazanılması yolunda liderliyin və idarəolunmanın müasir modellərindən nümunələr gətirdi.

Təhsil Problemləri İnstitutunun Kurikulum Mərkəzinin böyük elmi işçisi, Amerika Volden Universitetinin "Təhsildə Liderlik və Administrasiya Proqramı üzrə məktəb direktorlarının hazırlanması" proqramının məzunu kimi mən də Təhsil Sektorunun İnkişafı layihəsi olan Milli Kurikulum və onun tətbiqi sahəsində ölkəmizin əldə etdiyi nailiyyətlərdən bəhs edərək məktəblərin idarə olunmasında kurikulum standartlarının tətbiqinin vacib olduğunu vurğuladım və məktəb liderliyində, idarəolunmasında məktəb direktorları üçün standartların hazırlanmasının zəruri olduğunu qeyd etdim.

Bakı şəhər 238 nömrəli məktəbin ingilis dili müəllimi Təranə Böyükzadə bu layihə çərçivəsində Amerikanın Konnektikut ştatına səfəri ilə əlaqədar məktəb təcrübələrini iştirakçılarla bölüşdü.

Yay məktəbi çərçivəsində Amerika Viskonsin Universitetinin Təhsil Siyasəti və Kurikulumun inkişafı üzrə professoru Maykl Applinlə görüş maraqlı oldu.

Yay məktəbinin iştirakçıları Gürcüstanın tarixi yerlərinə - Msxeta qədim şəhərinə səyahət edərək ölkənin keçmişi ilə yaxından tanış oldular. Tiflis şəhərinin mərkəzində ulu öndərimiz Heydər Əliyevin şərəfinə salınmış parkla tanışlıq və ümummilli liderimizin abidəsini ziyarət etmək daha yaddaqalan oldu. Tədbirdə yay məktəbinin növbəti il üçün mövzuları müəyyən edildi.

Fəridə HÜSEYNOVA,
Təhsil Problemləri İnstitutu Kurikulum Mərkəzinin böyük elmi işçisi