Bu günlərdə Azərbaycan  Dillər Universitetində İndoneziya mərkəzinin açılış mərasimi keçirildi. Açılış rəmzi olan qırmızı lent kəsildikdən sonra universitet tələbələrinin ifasında İndoneziyanın və Azərbaycanın Dövlət himnləri oxundu. Mərasimi giriş sözü ilə açan ADU-nun rektoru, professor Səməd Seyidov bu  mərkəzin ADU-da  açılmasından məmnunluğunu dilə gətirdi. Rektor İndoneziyanın bu mərkəz vasitəsilə Azərbaycana daha da  yaxınlaşmasına əminliyini söylədi.

Sonra  çıxış edən İndoneziyanın İranda və Azərbaycanda akkreditə olunmuş səfiri İvan H.S.Viranata  Atmadjan sevinc içərisində olduğunu  qeyd etdi. İndoneziya mərkəzinin iki dövlət arasında mövcud olan sıx əlaqələrin daha da  inkişafına böyük töhfə verəcəyini  dedi. Səfir İndoneziya mərkəzinin  açılmasında böyük xidmətləri olan ADU-nun professoru  Həbib Zərbəliyevə təşəkkürünü çatdıraraq  onun fəaliyyətinin hər bir tələbəyə örnək olduğunu bildirdi. Çıxışından sonra səfir  İndoneziya prezidentinin  müvafiq sərəncamı ilə İndoneziya mədəniyyətinin təbliği, Azərbaycanda İndoneziya dili və ədəbiyyatının tədrisi, tədqiqi və təbliği sahəsində göstərdiyi xidmətlərə görə təltif etdiyi "Xidmətlərinə görə I dərəcəli Şərəf  ordeni"ni  H.Zərbəliyevə təqdim etdi.

Öz növbəsində professor  Həbib Zərbəliyev ADU-da İndoneziya mərkəzinin açılmasına  razılıq verən  rektor  Səməd Seyidova öz təşəkkürünü  bildirdi. Təltif edildiyi "Şərəf ordeni"nin ona gələcəkdə iki ölkə  və  xalq arasında mədəni əlaqələrin inkişafında daha səylə çalışmağa  imkan verdiyini dedi.

Sonda  qonaqlar İndoneziya mərkəzi ilə  yaxından tanış  oldular.

Şakir CƏFƏROV