Bu günlərdə Fransa Respublikası Georgi-Pontuase Universiteti (UCP) Versal Akademiyasının (İUFM) direktoru Jan-Pyer Şovalye və həmin institutun beynəlxalq əlaqələr üzrə direktoru Liliyan Lö Pöran təcrübə mübadiləsi məqsədilə Azərbaycan Müəllimlər İnstitutu, onun Şəki və Mingəçevir filiallarında olmuşlar. Bir həftə davam edən səfər zamanı qonaqlar Azərbaycan Müəllimlər İnstitutunda müxtəlif məzmunlu görüşlər keçirib, təcrübə mübadiləsi aparmışlar. Qonaqlar əlavə təhsil sahəsində institut əməkdaşlarının müxtəlif mövzularda təqdimatlarını dinləmiş, aparılan araşdırmalar və tədqiqatlarla tanış olmuşlar.

Səfər müddətində qonaqlar Azərbaycan Müəllimlər İnstitutunda son illərdə yaradılmış işgüzar şəraitdən, yeni təlim texnologiyalarının, yeni innovasiyaların tədris prosesində nəzərə alınmasından, informasiya-kommunikasiya texnologiyalarından səmərəli istifadə olunmasından razı qaldıqlarını bildirmişlər.

Səfərin yekunu olaraq hər iki ali təhsil müəssisəsində əməkdaşlıq fəaliyyətinin inkişaf etdirilməsi, tədqiqatlar və araşdırmalar aparılması və digər məsələlərlə bağlı ikitərəfli müqavilə imzalanıb.