Məktəbin builki məzunu Qasım Qasımzadə ABŞ-da təhsilini davam etdirmək üçün qəbul imtahanlarını müvəffəqiyyətlə verərək respublikada ən yüksək göstəricilər nümayiş etdirmiş və dünyanın tanınmış bir neçə universitetlərinə eyni zamanda qəbul olunmuşdur. O, kompüter mühəndisliyi ixtisası üzrə 16 Nobel mükafatı laureatı yetişdirmiş Case Western Reserve Universitetində təhsil alacaqdır. Riyaziyyat və fizika elmlərində xüsusi istedada malik olmaqla yanaşı, aparıcı kompüter dil proqramlarını da mükəmməl bilən Q.Qasımzadə Təhsil Nazirliyinin keçirdiyi "Gənc kompüter istedadları" müsabiqəsinin qalibi olmuş və birinci dərəcəli diplomla təltif olunmuşdur. Azərbaycan Respublikası Prezidentinin Sərəncamı ilə təsdiq olunmuş "2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı" çərçivəsində təhsilini davam etdirəcək  istedadlı həmyerlimiz Dövlət Neft Şirkətinin xüsusi komissiyasından keçərək şirkətin təqaüdünə layiq görülmüşdür. Q.Qasımzadə əldə etdiyi nailiyyətlərdə Z.Əliyeva adına məktəbin direktoru M.Vəliyevanın və müəllimlərinin əməyinin, şagirdlərə göstərdikləri qayğının böyük əhəmiyyəti olduğunu vurğulamışdır. O, xaricdə dövlət vəsaiti hesabına təhsil almaq imkanını yaradan möhtərəm Prezidentimiz İlham Əliyevə öz dərin təşəkkürünü bildirmişdir. Q.Qasımzadə göstərilən etimadı doğruldacağına, ölkəmizin adını daim yüksəkdə tutacağına söz vermişdir.

Y.ƏLİYEV