"İrs" Mədəni - Maarif Mərkəzinin rəhbəri, Bakı Şəhəri üzrə Təhsil İdarəsinin ibtidai siniflər üzrə  metodisti, uşaq yazıçısı Solmaz Amanovaya Avropa Təbiət Elmləri Akademiyasının (ATEA) akademiki adı verilib. Soydaşımız bu ada tibb, təhsil, tarix, irs, incəsənət sahəsində yazdığı kitablara görə layiq görülüb. O, bir çox nağılların müəllifidir. Bu nağıllarda milli folklorumuzun personajlarına, tarixi qəhrəmanlara, Azərbaycan mədəniyyətinin böyük simalarına rast gəlmək olar.

Onun şeirləri, nağılları, pyesləri informasiya ilə çox zəngindir. Bu əsərlər uşaqlara Vətənimizin tarixindən, mədəniyyətindən söhbət açır.

S.Amanova "Anatomiya teatrı", "Dünyanın bütün mahnıları mənim qəlbimdədir", "Qız və qızılgül", "Rəsmdə və poeziyada anatomiya", "İnsan iz qoyur", "Turac" və digər kitabların müəllifidir.

Fərəhləndirici haldır ki, onun "İrs", "Naslediye" və "Anatomiya teatrı" kitabları ötən ilin sentyabrında Moskvada keçirilmiş "Kitab sənəti" sərgi-müsabiqəsində ikinci və üçüncü yerləri tutub.

Azərbaycan Respublikası Təhsil Nazirliyinin  əmri  ilə  Solmaz  Amanovanın  hazırladığı "İrs" və "İnsan iz qoyur" kitabları ümumtəhsil məktəblərinin ibtidai sinifləri üçün  əlavə  vəsait  kimi  təsdiq  edilib.

S.Amanovaya bu səmərəli işlərində yeni-yeni yaradıcılıq uğurları, daha uca zirvələr fəth etmək arzulayır, onu Avropa Təbiət Elmləri Akademiyasının akademiki adı alması münasibəti ilə təbrik edirik. 

ƏDALƏT