Aprelin 10-da 1 nömrəli orta məktəbdə "Məktəbli gənclər Heydər Əliyev zəkasının işığında" mövzusunda Bakı şəhər ümumtəhsil məktəbləri şagirdlərinin yaradıcılığına həsr olunan konfrans keçirildi.

Tədbirdə təhsil naziri Misir Mərdanov, Bakı Şəhəri üzrə Təhsil İdarəsinin müdiri Nailə Rzaquliyeva, respublikanın tanınmış alim və pedaqoqları, paytaxt məktəblərinin şagirdləri iştirak edirdilər.

Konfransı Bakı Şəhəri üzrə Təhsil İdarəsinin müdiri Nailə Rzaquliyeva açaraq ölkə başçısı cənab İlham Əliyev tərəfindən təsdiq olunmuş "Xüsusi istedada malik olan uşaqların (gənclərin) yaradıcılıq potensialının inkişafı üzrə Dövlət Proqramı (2006-2010-cu illər)"nın icrası ilə əlaqədar təhsil müəssisələrində silsilə tədbirlərin keçirilməsinin rəhbərlik etdiyi qurum tərəfindən daim diqqətdə saxlanıldığını söylədi. Qeyd etdi ki, son illər məktəblilər arasında müxtəlif mövzularda bilik yarışlarının, olimpiadaların, inşa, rəsm, plakat müsabiqələrinin, baxış-sərgilərin, idman yarışlarının keçirilməsi artıq bir ənənəyə çevrilmişdir. Bakı Şəhəri üzrə Təhsil İdarəsinin fəaliyyət planına əsasən cari dərs ilində də bu istiqamətdə xeyli işlər görülüb. Həyata keçirilən tədbirlər haqqında geniş məlumat verən Nailə Rzaquliyeva bugünkü konfransın da növbəti tədbirlərdən biri olduğunu dedi. Bildirdi ki, konfransda şagirdlər  13 bölmə üzrə ayrı-ayrı fənlər, o cümlədən Azərbaycan tarixinin müxtəlif dövrləri, respublikamızın beynəlxalq aləmdə mövqeyi, onun siyasi-iqtisadi, sosial-mədəni həyatı, görkəmli tarixi şəxsiyyətləri, ədəbiyyat, incəsənət xadimləri, cəmiyyətdə gənclərin rolu, dünya dövlətləri, ekoloji problemlər və digər məsələlərlə bağlı hazırladıqları yaradıcılıq işlərinin təqdimatını edəcəklər. Bakı Şəhəri üzrə Təhsil İdarəsinin müdiri tədbirin keçirilməsində əsas məqsədin xüsusi istedada və yaradıcılığa malik şagirdləri aşkar etmək, bu istiqamətdə aparılacaq işlərin səmərəli yollarını müəyyənləşdirmək, forma, məzmun və innovasiya fəaliyyəti baxımından daha da təkmilləşdirməkdən ibarət olduğunu dedi.

Çıxışının sonunda Nailə Rzaquliyeva konfransda iştirak edən şagirdlərə uğurlar dilədi.

Sonra çıxış üçün söz  təhsil naziri Misir Mərdanova verildi. Nazir  iştirakçıları salamlayaraq onları bu  konfransda görməyindən məmnunluq hissi keçirdiyini bildirdi. Müstəqil  Azərbaycan dövlətinin banisi və  qurucusu  ümummilli liderimiz Heydər Əliyevin hər zaman təhsilə, gənclərə xüsusi diqqət və qayğı göstərməsindən danışan nazir hazırda onun layiqli davamçısı, ölkə Prezidenti  cənab İlham Əliyev tərəfindən də bu məsələlərə həssaslıqla yanaşıldığını qeyd etdi. Ölkə başçısı cənab İlham Əliyevin  elmin, təhsilin inkişafı, istedadlı gənclərin aşkar edilməsi istiqamətində gördüyü işləri yüksək dəyərləndirən nazir bu haqda ətraflı söz açdı. Qeyd olundu ki, ölkə başçısı tərəfindən təsdiq edilmiş "Xüsusi istedada malik olan uşaqların (gənclərin) yaradıcılıq potensialının inkişafı üzrə Dövlət Proqramı (2006-2010-cu illər)" çərçivəsində bir sıra məqsədyönlü tədbirlər həyata keçirilir. Ölkəmizin orta ümumtəhsil məktəblərində kifayət qədər istedadlı və qabiliyyətli uşaqların olduğunu deyən təhsil naziri Misir Mərdanov onlarla aparılan işlərin davamlı olacağını qeyd etdi.

İstedadlı və bacarıqlı uşaqların üzə çıxarılmasında, onların yaradıcılıq potensialının inkişaf etdirilməsində belə tədbirlərin müstəsna rolundan danışan nazir bütövlükdə Bakı Şəhəri üzrə Təhsil İdarəsinin fəaliyyətini də müsbət qiymətləndirdi. Konfrans iştirakçılarına bir sıra tövsiyələr verən təhsil naziri Misir Mərdanov sonda şagirdlərə müvəffəqiyyətlər arzuladı.

Konfransda iştirak edən millət vəkili Məlahət İbrahimqızı son illər ölkə təhsilinin, elminin uğurla inkişaf etdiyini, bu sahədə müsbət nəticələrin əldə olunduğunu bildirdi. Millət vəkili ölkə Prezidenti cənab İlham Əliyevin təhsilə göstərdiyi diqqət və qayğıdan söz açdı.

Sonra konfrans öz işini bölmələrdə davam etdirdi. Paytaxtın 110 məktəbindən 180-ə qədər şagird 13 bölmə üzrə  müxtəlif mövzularda  hazırladıqları məruzə və təqdimatları etmək üçün xüsusi ayrılmış sinif otaqlarına getdi.

Bölmələr üzrə müəyyənləşdirilmiş ayrı-ayrı sinif otaqlarında olan  nazir Misir Mərdanov məktəblilərin hazırlıq səviyyəsi ilə maraqlandı,  onlara  nailiyyətlər  arzu etdi. 

Samirə KƏRİMOVA