Qonaqları Təhsil Nazirliyində görməkdən məmnunluğunu bildirən Misir Mərdanov öncə Azərbaycanın təhsil sistemi və görülən işlər barədə məlumat verib. Son 6 ildə ölkə Prezidentinin və Heydər Əliyev Fondunun təşəbbüsü ilə 2 mindən çox yeni məktəbin, tədris ocaqları üçün əlavə korpusların tikildiyini, əsaslı təmir olunduğunu nəzərə çatdıran nazir ölkəmizdə təhsil sahəsində əldə edilən nailiyyətləri ümummilli liderimiz Heydər Əliyevin və onun layiqli davamçısı, dövlətimizin başçısı cənab İlham Əliyevin uğurlu siyasətinin nəticələri kimi dəyərləndirib. Təhsilimizin keçdiyi inkişaf yolundan, qazanılan uğurlardan söz açan Misir Mərdanov ölkəmizin qarşılaşdığı problemlər - Dağlıq Qarabağ münaqişəsi, torpaqlarımızın 20%-nin işğal olunması, azərbaycanlıların doğma torpaqlarından didərgin düşmələri, buradakı təhsil müəssisələrinin dağıdılması barədə də məlumat verib. Nazir təhsil müəssisələrinin İKT ilə təminatı sahəsində həyata keçirilən tədbirlərdən bəhs edərək 1000-dən çox orta məktəbin genişzolaqlı internet şəbəkəsinə qoşulduğunu bildirib.

Misir Mərdanov qonaqlara ölkəmizdə fəaliyyət göstərən ali məktəblər, dünya təhsil sisteminə inteqrasiya yolunda aparılan islahatlar, Azərbaycanın Boloniya prosesinə qoşulması və bu istiqamətdə atılan addımlar haqqında söhbət açaraq qeyd edib ki, hazırda 10 mindən çox azərbaycanlı gənc dünyanın müxtəlif nüfuzlu universitetlərində, 7 minə yaxın əcnəbi tələbə isə ölkəmizin ali təhsil müəssisələrində təhsil alır. Nazir "Azərbaycan gənclərinin xarici ölkələrdə təhsili üzrə Dövlət Proqramı (2007-2015-ci illər)" çərçivəsində gənclərimizin müxtəlif ixtisaslar üzrə dünya universitetlərində təhsil aldıqlarını da vurğulayıb.

Hələ Sovet dövründə Azərbaycanın dünya ölkələri ilə təhsil sahəsində yaratdığı əlaqələrdən, müxtəlif ölkələrdən olan mütəxəssislərin burada çalışmalarından bəhs edən Misir Mərdanov bildirib ki, Qambiya ilə Azərbaycan arasında təhsil sahəsində əlaqələrin qurulması xalqların bir-birini yaxından tanımasına, təhsil və elm sahəsində yeni nailiyyətlər qazanılmasına səbəb ola bilər.

Səmimi qəbul üçün təşəkkür edən Qambiya Respublikasının xarici işlər, beynəlxalq əməkdaşlıq və xaricdəki qambiyalılar üzrə naziri Usman Cammeh Azərbaycana səfərindən məmnun olduğunu bildirib. U.Cammeh Qambiya ilə Azərbaycan arasında təhsil sahəsində əlaqələrin yaradılmasına böyük önəm verdiklərini açıqlayıb və son illərdə öz ölkəsində bu sahədə görülən işləri diqqətə çatdırıb. Ali təhsil sahəsində əməkdaşlığın qurulması istiqamətlərindən söz açan qonaq qambiyalı gənclərin Azərbaycanın universitetlərində, xüsusilə Azərbaycan Dövlət Neft Akademiyasında, Milli Aviasiya Akademiyasında təhsil almalarında maraqlı olduqlarını qeyd edib. U.Cammeh iki ölkə arasında təhsil sahəsində səmərəli əməkdaşlığın təşəkkül tapacağına əmin olduğunu ifadə edib.

Sonra Qambiya Respublikasının ali təhsil, tədqiqatlar, elm və texnologiyalar naziri Mamadu Tanqara öz ölkəsinin təhsil sistemi, yeni yaradılan universitetlər və digər məsələlərdən söz açıb.

Səmimi və qarşılıqlı anlaşma şəraitində keçən görüşdə Azərbaycan Respublikasının Qambiyadakı fövqəladə və səlahiyyətli səfiri Sabir Ağabəyov da  iştirak edib.