Aprelin 13-də Azərbaycan Beynəlxalq Universitetində  görkəmli dövlət xadimi, məşhur pedaqoq, həkim, dramaturq, nasir, publisist Nəriman Nərimanovun anadan olmasının 140-cı ildönümünə  həsr olunmuş elmi-praktik konfrans keçirildi.

Tədbiri giriş sözü ilə Azərbaycan Beynəlxalq Universitetinin rektoru, hüquq elmləri doktoru, professor Elşad Abdullayev açaraq konfransın əhəmiyyəti haqda danışdı.

Sonra "N.Nərimanov tədqiq edildikcə yüksələn şəxsiyyətdir" mövzusunda məruzə edən akademik Hüseyn Əhmədov bildirdi ki, XIX əsrin sonu, XX əsrin əvvəllərində  yaşayıb - yaratmış Nəriman Nərimanov xalqın maariflənməsi və milli dirçəlişində mətbuatın roluna  böyük əhəmiyyət verirdi. Sözün əsl mənasında da N.Nərimanov Azərbaycanın məktəb və pedaqoji fikir  tarixində özünəməxsus orijinal fikirlərə malik bir sima idi.  

BDU-nun professoru, filologiya elmləri doktoru  Alxan Bayramoğlu "Nəriman Nərimanov və azərbaycanlıların mart soyqırımı məsələsi", Azərbaycan Respublikası Prezidenti yanında Dövlət İdarəçilik Akademiyasının dosenti Firdovsiyyə Əhmədova "N.Nərimanov ictimai-siyasi xadim kimi", ABU-nun professorlarından İslam Zeynalov "Görkəmli dövlət xadimi" və Xəlil Köçərli "N.Nərimanovun publisistikasında milli oyanış problemləri" mövzularında məruzələr etdilər.

Sonra konfrans öz işini ayrı-ayrı bölmələr üzrə davam etdirməklə başa çatdırdı.  

Şakir CƏFƏROV