Naxçıvan Dövlət Universitetində 2009-2010-cu tədris ilinin ikinci semestrinə aid pedaqoji təcrübənin başlanğıc konfransı keçirilmişdir. NDU-nun rektoru, akademik İsa Həbibbəyli çıxış edərək təhsil sistemində pedaqoji təcrübənin əhəmiyyətindən, ali və orta ümumtəhsil müəssisələrinin müntəzəm birgə əməkdaşlığının rolundan danışmışdır. Qeyd edilmişdir ki, tələbələrin qabaqcıl pedaqoqların bilik və peşə vərdişlərini  mənimsəmələri, pedaqoji prosesi əyani şəkildə öyrənməkləri gələcəyin müəllimləri üçün zəruridir.

Tədris işləri üzrə prorektor, əməkdar elm xadimi Hüseyn Həşimli pedaqoji təcrübə dövründə qarşıda duran vəzifələr və hazırlanacaq sənədlər haqqında ətraflı məruzə etmişdir. Pedaqogika və psixologiya kafedrasının müdiri Vahid Rzayev çıxışında təcrübə dövründə pedaqogika və psixologiya üzrə görüləcək işlərdən söz açmışdır. Naxçıvan MR Təhsil Nazirliyinin aparat rəhbəri Rəşad Quliyev muxtar respublikada pedaqoji təcrübənin mükəmməl keçirilməsi üçün yüksək şərait yaradılmasından, orta məktəblərdə zəngin bilik və təcrübəyə malik müəllimlərin, yeni texniki avadanlıqların və əyani vəsaitlərin olmasından bəhs etmişdir. Çıxışlarda təcrübi dərslər zamanı müəllim-şagird münasibətlərinin pedaqoji ustalıqla yaradılması, informasiya-kommunikasiya vasitələrindən istifadə, əlamətdar tarixi günlərə həsr olunmuş elmi-kütləvi tədbirlərin keçirilməsi ilə bağlı tələbələrə bir sıra dəyərli tövsiyələr verilmişdir.  

Mehriban SULTAN