Aprelin 14-də Bakı Dövlət Universiteti nəzdində fəaliyyət göstərən "Gənc istedadlar" liseyində "İngilis dilini öyrənirik" mövzusunda tədbir keçirildi.

Öncə tədbir iştirakçıları 5 sinif otağında ingilis dilində aparılan "açıq dərs"də iştirak etdilər. Bu dərslərdə müəllimlər şagirdlərə ingilis dilində mövzular ətrafında suallar verir və onlardan cavablar alırdılar.

Sonra "dəyirmi masa" ətrafında dərslərin müzakirəsi keçirildi. BDU-nun elmi işlər üzrə prorektoru, professor İsmayıl Əliyev müəllim və şagirdlərdən razı qaldığını bildirərək, xarici dilin daha da dərindən öyrənilməsinin  vacibliyini vurğuladı. O, belə tədbirlərin keçirilməsini təqdirəlayiq hal kimi qiymətləndirərək, müəllimlərə tədrislə bağlı tövsiyələrini verdi. "Açıq dərs" haqqında fikir söyləyən digər qonaqlar da tədrisin keyfiyyətinin yüksək olduğunu söylədilər.

"Dəyirmi masa" başa çatdıqdan sonra iştirakçılar  liseyin akt  zalında şagirdlərin iştirakı ilə ingilis dilində aparılan bədii hissəyə tamaşa etdilər. Bədii hissəni açıq elan edən liseyin direktoru, kimya elmləri doktoru, professor Qasım Hüseynov bildirdi ki, lisey üç ilə yaxın fəaliyyəti müddətində bir sıra uğurlar əldə etmişdir. O, liseyin ilk məzunlarının hər birinin nüfuzlu ali məktəblərə daxil olmasını ilk uğurları hesab etdiyini bildirdi. Bilik, intellekt və idman yarışlarında lisey şagirdlərinin qalib olduqları vurğulandı. Q.Hüseynov keçən il liseydə "Müasir şəraitdə orta ümumtəhsil məktəblərində tədrisin keyfiyyətini yüksəltmək yolları" mövzusunda keçirilən konfransın və digər tədbirlərin əhəmiyyətindən söz açaraq, belə bir şəraitin yaradılmasına görə təhsil naziri Misir Mərdanova, BDU-nun rektoru, akademik Abel Məhərrəmova minnətdarlığını bildirdi.

Şagirdlərin  ingilis dilində hazırladıqları çıxışları qonaqlar tərəfindən maraqla qarşılandı. 

Niyazi RƏHİMOV