Aprelin 13-də Azərbaycan Dillər Universitetində (ADU) Təhsil Nazirliyi və Azərbaycan Təhsil İşçiləri Azad Həmkarlar İttifaqı Respublika Komitəsinin birgə təşkil etdiyi ümummilli liderimiz Heydər Əliyevin anadan olmasının  87-ci ildönümünə həsr olunmuş ali məktəb tələbələrinin  bədii yaradıcılıq festivalı keçirildi. Tədbirdə ADU-nun rektoru, millət vəkili, professor Səməd Seyidov, universitetin professor-müəllim heyəti və tələbələri iştirak edirdilər. Şair Baba Vəziroğlu, bəstəkar Faiq Sücəddinov,  xalq artisti Yalçın Rzazadə  münsiflər heyətinə daxildilər.

Tədbirdə qeyd edildi ki, Azərbaycan xalqının ümummilli lideri Heydər Əliyevin milli mənəvi dəyərlərimizə xüsusi diqqəti və ona böyük önəm verməsi ölkəmizdə milli özünüdərk prosesinin uğurla getməsinə geniş rəvac vermişdir. Mədəni irsimizin qorunub saxlanmasında, inkişaf etdirilməsində, onun geniş təbliğində, dünya miqyasında şöhrət tapmasında ulu öndərimiz Heydər Əliyevin çox böyük və əvəzsiz xidmətləri olmuşdur.

Bədii yaradıcılıq festivalının əsas məqsədi ali məktəb tələbələrini milli vətənpərvərlik, mədəniyyətimizə, incəsənətimizə, milli adət-ənənələrimizə hörmət ruhunda tərbiyə etmək, eyni zamanda incəsənət sahəsindəki istedadlarını üzə çıxarmaq və inkişaf etdirməkdir.

Festivalda ADU-nun tələbələrindən ibarət "Dalğa" rəqs qrupu müxtəlif rəqslər nümayiş etdirdi, xor kollektivi "Heydər atamız", "Təbiəti qoruyaq" və s. mahnılar ifa etdi, vətənpərvərlik ruhunda şeirlər səsləndirildi. Eyni zamanda ulu öndərin həyat yolunu əks etdirən kinosüjet təqdim edildi.

Festivalda Azərbaycanı Eurovision-2009 müsabiqəsində uğurla təmsil edərək ilk üçlüyə qatılmağı bacaran ADU-nun regionşünaslıq fakültəsinin 4-cü kurs  tələbəsi  Aysel Teymurzadə "Falling" və "Always on my mind" mahnılarını səsləndirdi. ADU tələbələrinin hazırlığından məmnunluğunu bildirən münsiflər heyəti tələbələrə uğurlar arzuladı. Rektor Səməd Seyidov tələbələrə, münsiflər heyətinə, həmçinin Aysel Teymurzadəyə təşəkkür etdi.

Sonda Azərbaycan Dillər Universitetinin himni səsləndirildi.

Şakir CƏFƏROV