Aprelin 12-də BDU-nun rektoru, akademik Abel Məhərrəmov Türkiyənin ölkəmizdəki səfiri Hulusi Kılıcı qəbul edib. Görüşdə Azərbaycan-Türkiyə münasibətləri, o cümlədən təhsil sahəsində fikir mübadiləsi aparılıb. Universitetdə təhsil alan türkiyəli gənclər haqqında danışan rektor qardaş Türkiyənin Azərbaycana tələbə göndərərkən daha savadlılarına üstünlük verməsinin gərəkliliyindən bəhs edib. Səfir Hulusi Kılıc Okan Universiteti rəhbərliyinin BDU-ya gəlmək niyyətlərini və azərbaycanlı tələbələrin adıçəkilən universitetdə təhsi almaları üçün maraqlı olduqlarını bildirib. Sonra səfir rektor A.Məhərrəmovu Türkiyə universitetlərini ziyarətə dəvət edib.

Görüş sosial elmlər və psixologiya fakültəsində davam etdirilib. Adıçəkilən fakültədə TİKA və Gəncliyə Yardım Fondu tərəfindən qurulan, 12-13 nəfər tələbənin kompüterlə sərbəst işləyəcəyi otağın açılışı olub. Azərbaycan-Türkiyə dostluğunun, qardaşlığının daimi olduğunu söyləyən akademik Abel Məhərrəmov ümummilli lider Heydər Əliyevin "Bir millət, iki dövlət" fikrini yada salaraq  göstərdikləri diqqətə, qayğıya görə Türkiyə Böyükelçiliyinə, TİKA və Gəncliyə Yardım Fondunun rəhbərlərinə təşəkkür edib. "Sizinlə işləməyə hər zaman hazırıq", - deyən səfir isə öz növbəsində ölkələrarası münasibətlərin inkişafından, təhsil sahəsində qurulan əməkdaşlıqdan son dərəcə məmnun olduğunu bildirib. Daha sonra 50 nəfərlik konfrans otağına baxış keçirilib.

Fəlsəfə tarixi kafedrasının müdiri, professor Rəbiyyət Aslanova BDU-nun rəhbərliyinə və fakültəyə göstərdikləri diqqətə görə səfirlik işçilərinə təşəkkür edib.

Görüş qarşılıqlı maraq doğuran fikir mübadiləsi əsasında başa çatıb.  

Nizami MİRZƏ