Azərbaycan Milli Elmlər Akademiyasının Riyaziyyat və Mexanika İnstitutu və Azərbaycan Müəllimlər İnstitutunun Mingəçevir filialının birgə təşkilatçılığı ilə "Nəzəriyyədən praktikaya dövrün tələbidir" adlı elmi-praktik konfrans keçirildi.

Konfransı giriş sözü ilə filialın direktoru, professor Orucəli Rzayev açaraq, ulu öndər Heydər Əliyevin 13 iyun 2000-ci il tarixli fərmanı ilə yaradılmış AMİ-nin Mingəçevir filialı və onun son illərdəki uğurları haqqında məlumat verdi.  Bildirildi ki, regionun qabaqcıl ali təhsil müəssisələrindən sayılan Mingəçevir filialında bu gün riyaziyyat və informatika, riyaziyyat və fizika, ibtidai sinif müəllimliyi, İngilis dili, Azərbaycan dili və ədəbiyyat ixtisasları üzrə 600-dən artıq tələbə təhsil alır.

Konfransda Mingəçevir Şəhər İcra Hakimiyyəti başçısının birinci müavini İlham İsmayılov, AMEA-nın Fizika-Riyaziyyat və Texnika elmləri bölməsinin akademik katibi, Riyaziyyat və Mexanika İnstitutunun direktoru, akademik Akif Hacıyev, AMEA-nın Radiasiya Problemləri İnstitutunun direktoru  Adil Qəribov,  Nəsirəddin Tusi adına Şamaxı Astrofizika Rəsədxanasının direktoru Əyyub Quliyev və başqaları çıxış etdilər.

Konfrans öz işini bölmələrdə davam etdirdi. Bölmələrdə ümumilikdə 17 məruzə dinlənildi.

Sonra bölmə rəhbərləri öz hesabatlarını təqdim edərək müzakirə olunan məsələlərin səmərəliliyini daha da artırmaq üçün rəy və təkliflərini bildirib, bu kimi konfransların mütəmadi keçirilməsinin məqsədəmüvafiq olduğunu qeyd etdilər.

Sonda konfrans iştirakçıları AMİ-nin Mingəçevir filialının kompüter mərkəzi, laboratoriya və kabinetləri ilə tanış olub, xatirə şəkilləri çəkdirdilər. 

R.ZİYADOV